Aizawl: Mizoram Peoples Conference (MPC) leh PRISM ten party pakhata inchhunfin an tumna chuan a la thleng tawi hle a, policy leh constitution te an zirchiang mek.

Zalen palaiin PRISM President Vanlalruata a kawmnah party pahnih te policy leh an party inkaihhruaina dan 'constitution' te zirchian mek bak chu thiuldang tih an la nei lo niin a sawi a. "Kan policy leh constitution te hi a inhnerem thei em tih kan zirchiang tawn mek a. A hmawr kan bawk hun tur hi a la hriat loh a ni," a ti.

PRISM President chuan party pahnih te chu official takin tum engemaw zat an in dawr tawh tih sawiin MPC lamin helam buaipuitu tur an ruat a. PRISM lam pawhin thutawp chu an party PAC kutah an dah tih a sawi a. Party hming thar tur, party symbol leh hruaitu tur chu engmah an la sawiho lo niin a sawi bawk.

March ni 18, 2020 khan MPC Party leh PRISM Party aiawh te hian MPC President room ah meeting neiin inchhunfinna tur a hmalakna thui tak an lo neih tawh thlirletna an nei a ni.