ZALEN August 7, 2023 : Vawiin khan MPCC President Lalsawta chuan Positive Women Network of Mizoram (PWNM) hruaitute chu PWNM Office, Upper Khatla-ah a tlawh. Mizorama HIV a tlak hniam theihna tura kawng awmdan leh hmalak dan tur te an sawiho a, Lalsawta hian PWNM te tanpuina tangkafai a hlan. 

Lalsawta chuan Mihring chu ran ang maia Pathianin a siam a nih loh avangin nun hona kawngah nasa zawka harsatna leh inpuih ngaihna kawnga tan lak ho a tul, tih a sawi a. Harsatna chu tu chungah pawh tla thei vek a, harsatna in a tuai hriam loh mihring an chhawr tlak loh, tiin. Harsatna tam tak paltlang a, beidawnna leh manganna hmachhawntute hlawhtlinna chu an hlu bik a, vanduaina a thlenin in dawmkan leh inpuih tawn chu Lal Isua zirtir dan a ni a. Harsatna tawha vanduai bika inngaihna chuan rilru dik lo a pe a, nih tur ang ni phak lo vin mi a pawtthla thin, a ti. 

MPCC President chuan, "Pathianin khawvela nungdama min dah chhan zawk hi kan thlir reng a tul a. Mihring famkim lo kan ni a, kan hun kal tawhah tih fel loh tam tak kan nei thei. Nimahsela hun liam tawh chu koh kir theih a ni lo va, eng pawisa mahin hun kal tawh a lei let theih hek loh. Tuna kan tihtur hmasa ber chu kan ram, kan hnam leh kan rinna humhim turin, keini leh nangni tana kan thawh a hun takzet a, kan tihmakmawh a ni," a ti bawk. 

PWNM hotute chuan, harsatna tam tak paltlanga PWNM an din dan leh an hmalak chhoh dan te leh midang ten damna an chan theihna tura an bul tan a nih dan te, Sorkar nena an thawhona hrang hrang te bakah tunhnaiah Kohhran hrang hranga Kohhran hmeichhia ten hemi kawnga an thawhpuina an hlawkpui zia te bakah Mizorama HIV dinhmun te sawiin inenkawlna tha dawngtu te dinhmun leh an harsatna te an tarlang a ni.