Aizawl; Mizoram Pradesh Congress Committee (MPCC) Disciplinary Action Committee in insawifiah tura hriattirna (show cause notice) a pek hnuah, Mara Autonomous District Council (MADC) huam chhunga district congress hotute leh congress MDC te chuan show cause notice an chhanglet tawh a. Hetihlai hian district congress president S Hiato chuan action na tak a awm chuan boruak awm dan tur a hriatthiam loh thu a sawi. 

Mara District Congress Committee (MDCC) president S Hiato chuan ZALEN zawhna chhangin May 31 khan chhanna an thawn tawh tih a sawi a. S Hiato chuan North East Democratic Alliance (NEDA) ah BJP leh MNF chu inzawm sa an nih avangin, anni in sawrkarna siam mai sela Congress party chu lang lo tur an nih thu te, mahse an kal zelna turte leh an mite opposition a awm rei tawh te an thlirin, ruling a thut ve an duh thute show cause notice chhannaah chuan an tarlang tih a sawi.  

Congress party PAC duh dan kalha an chet nachhan tarlangin, pawi an tih thu an tarlang bawk. Heng bakah hian bye-election neih chu an zo lo nia an hriat thu te an tarlang niin a sawi bawk.

ZALEN zawhna chhangin, show cause notice inpek chuan boruak tha lo a thlen a rin loh thu S Hiato chuan sawiin, an hotuten an tih tur dik tak an tiah a ngai tih a sawi. "Mizoram pumpui thlir tur an nih avangin an tih tur dik tak an tiah ka ngai a, boruak chhia a awm ka ring lo," tiin, "Amaherawhchu, kan chhan hnu a action rit tak a awm erawh chuan ka hrethiam lo, chutiang chu a awm lo turah erawh kan beisei," a ti.

MPCC Political Affairs Committee (PAC) chuan MADC huam chhunga district congress hotute leh congress MDC palite chu, congress party PAC duh dan kalha MNF nena sawrkar siam tura thutlukna an siam chungchangah insawifiah turin  show cause notice Siaha district congress hotute leh congress MDC te chu show cause notice pek an ni.