Aizawl: Mizorama inthlanna muanawm leh felfai a awm theihna atana hma latu Mizoram People Forum leh Political party hrang hrangte chuan thawhhona thuthlung an duan chu a tlangpuiin an pawm. MPF hian tunhnaia district a puan thar Khawzawl leh Saitualah te District Forum din an tum bawk.

MPF leh political party hrang hrangte hian thawhhona tura thuthlung an siam hi a tlangpuiin an pawm a, kan hma lawka Loca/Village Council leh Aizawl Municipal Corporation inthlan loawm turah hman tan tum a ni.

MPF leh political party-ten thawhhona thuthlung an siama thil thar langsar zingah hian Candidate te house to house campaign khap chu ‘Election puan a nih hnuah house to house campaign hi candidate-te tan phal a ni ang. Amaherawhchu, sum leh therhlo nena len ni lo se. Party worker-ten candidate-te tel lova house to house campaign neih loh nise’ tia thlak a ni.

Joint platform neih loh nise, MPF in tul a tih chuan state level in neih theih a ni ang tih chu ‘Joint platform hi MPF leh candidate-ten tul leh rem an tih tlan chuan central forum, constituency forum leh local forum ten anmahni area theuhah an buatsaih thei ang a, MPF hruaituten an kaihruai zel ang’ tia thlak a ni bawk a ni.

` ‘Public entertainer-te reng reng man neia campaign nan hman loh tur a ni’ tih chu paih niin party malin public meeting neih an duh chuan MPF kaihhruaina hnuaiah neih a ni ang tih chu ‘Party malin emaw independent candidate-in emaw public meeting neih an duh chuan MPF kaihhruaina hnuaiah neih a ni ang’ tiiin thlak a ni bawk.

Thawhhona thuthlung bawhchhia an awm a, constituency/area chhunga puan thin chu ‘Constituency/Area huam chhung mai bakah a tul angin a puangzar ang’ tia belh a ni bawk.

Zalen palaiin a biaknaah MPF General Secretary Rev. R.Lalnuntluanga chuan thawhhona thuthlung an siam chu a tlangpuiin political party te’n an remti tlang deuh vek tih a sawi a. Party thenkhat ‘sawiho leh lawk ang u,’ ti an awm nia sawiin, “Party thenkhat hian siam that hret an duh a ni mai thei a. Kan thawhhonaah hian kan hmin tlan a ngai a. Keini lamin kan duh lai tak hi thenkhat chuan paih an duh lai a ni a, tihruk theih awm thin hi keini lam chuan khap kan duh a ni,” a ti.

‘Party worker-ten candidate-te tel lova house to house campaign neih loh nise,’ tia rawtna an siam chhan sawi fiahin, “Hei hi thenkhat chuan hnawk an ti deuh niin a lang a, mi thenkhat len paha an titi chu kan khap ngawt thei lo va. Mahse, party worker-ho an vah suau suau chuan boruak a tikhawlo thei a; chuvangin, khap kan duh a ni,” a ti bawk.

MPF General Secretary chuan March thla hun remchang hmasa berah tun hnaia district a puan thar, Khawzawl leh Saitualah te district forum din an tum tih a sawi a. Hetih lai hian Hnahthialah chuan mi leh sa an neih loh vangin din an tum lo niin Zalen palai a hrilh.

Baptist Church of Mizoram te MPF ah tel ve tura sawm an tum leh tum loh zawhna chhangin Rev. R.Lalnuntluanga chuan, “Kum tin kan sawm a, tha deuhin min chhang a; mahse, vawiin thlengin an la tel lo va. Chuvangin, tun dinhmunah chuan MPF a tel tur hian sawm kan tum ta hrih lo a ni,” a ti bawk.