April 5, 2024; Mizoram Public Service Commission (MPSC) hotute chuan India Constitution in MPSC mawhphurhna a pek ang ngeiin tha taka hna thawk turin theihtawp in hma a la zel dawn tih an sawi a, MPSC exam leh a hnathawh chungchang a hriat duh nei a piang chuan thawktute hnenah zawh fiah theih reng a ni tih an sawi.

Vawiin a thuthar thehdarhtute an kawmna ah MPSC hotute chuan tunhnai ah media hrang hrang leh social media ah MPSC exam kalphung chungchang leh a bik takin MCS (Combined) examination 2023 chungchangah thu lengvak a tam tih an sawi a, hei hian exam beitute rilruah leh mipuite ah boruak tha lo leh hlauhthawnna a thlen palh thei a, chuvangin, MPSC in examination a kalpui dan chungchang tarlan tulah an ngai tih an sawi.

MPSC hna lakna ah sawiselna lian tham a awm hriat a nih ngai loh thu leh chu chu MPSC in hna lakna ah dik leh fel fai taka a kalpui thin vang a nih thu an sawi bawk.

MPSC in direct recruitment a kalpui a written exam zawhna chhanna a en dan (evaluation) kalphung hrang hrangte MPSC hotute chuan sawifiahin, first evaluator, second evaluator leh third evaluator/scrutinizer te awmin, evaluation chu chhawng 3 a kalpui thin a ni tih an sawi.

MPSC hotute tarlan thenkhat :

MPSC in exam a kalpui na atan expert tam tak a mamawh, chungte chu question setter, moderator, first evaluator, second evaluator leh scrutinizer te an ni.

MCS (combined) exam 2023 ah khan expert hrang hrang 213 lai ruat an ni.

MPSC hi India Constitution in mawhphurhna a pek ang ngeiin tha taka hna thawk turin theih tawpin hma a la zel dawn.

A bik takin MCS (combined) exam 2023 chungchang ah Gauhati High Court, Aizawl Bench ah Writ Petition thehluh a ni a, chuvangin he exam chungchang a MPSC laka lungawi lohna neite thu hi court in dan angin a rel fel tura inchiah mek a ni.

Thil hre chiang lo leh lungawi lohna neiten MPSC hi a tihmingchhe zawnga an kalpui hi ram tan a tha lo va, MPSC chuan pawi a ti takzet a ni.