Aizawl December 23, 2022: Mizoram Pradesh Youth Congress Committee chuan kumin chhunga an chetvelna a Pathian awmpuina an chan avangin lawmthu an sawi a, ram leh hnam tana an hmalaknaa tawiawmtu mipuite chungah thinlung takin lawmthu an sawi.

MPYCC chuan an phak tawk zelin sawrkar tha neih theih nan hma an la thin an ti a, an hmalaknate thahnemngai taka min puanzarsaktu thuthar thehdarhtute chungah lawmthu an sawi a, hma lam hunah pawh tawiawm chhunzawm zel turin an ngen.

Kumin chhunga an chetvelnaah leh an hmalaknaah MPYCC ten mi pawi an sawi a anih chuan mipuite ngaihdamna an dil a,  an thil tih te mipuite hmasawnna tura ti an ni tih hriatsak turin an duh tih an sawi. 

Krismas leh Kumthar hlim taka hmang turin Zoram mipuite duhsakna an hlan a, MPYCC chuan, "Krismas leh Kumthar chibai kan buk che u. Congress Thalai member te pawh kan awmna hmun theuhah midangte tana malsawmna thlentu ni turin kan in chah nghal bawk," an ti.