Aizawl May 21, 2024 : Mizo Students’ Union (MSU), General Headquarters, Aizawl chuan vawiin-a Mizoram Board of School Education (MBSE)-in Higher Secondary School Leaving Certificate (HSSLC) 2024 result a ti chhuak hi lawmawm an ti a, stream hrang hranga exam hmachhawn zirlai 11,824 aṭanga zirlai 9227-in hlawhtlinna an chang thei chu MSU chuan lawmawm an ti a; zirlai vanduai ta 2,545 baka zirlai 170 absent-te chu MSU chuan pawi a tihpui a, beidawng mai lova tan la thar zel turin duhsakna an hlan a ni.

MSU chuan HSSLC result 2024-a 100% Pass Percentage nei thei School – Arts Stream-ah 54, Science Stream-ah 2 leh Commerce Stream-ah School 6 an awm chu MSU chuan lawmawm a ti a, 100% fail school 5 a awm erawh pawi a ti a ni. Chutihrualin, kumin pass percentage 78.04 chu nikum 2023-a pass percentage 78.66 aia 0.62%-a a hniam erawh hmasawnna tur a la awmin MSU chuan an hria a ni.

HSSLC 2024 result-a Mizo zirlai 34 lai stream hrang hrang (Arts, Science & Commerce)-a Top 10-a an lang hi MSU chuan lawmawm an ti a, Mizo zirlai stream hrang hrang atanga Top-3-te hi MSU chuan May ni 29, 2024 (Nilaini)-ah Chanmari YMA Hall-ah lawmpuina hun a buatsaihsak dawn a, zirlai, zirtirtu leh nu leh pate lo tel turin an insawm nghal a ni.

MSU chuan zirlai hlawhtlinna chang zawng zawngte chu Mizoram tana chhawr tlak leh Mizo hnam tana hman tlak thiamna zir chhuak ngei turin an kal zelna turah duhsakna a hlan a; hlawhtlinna chang zo ve ta lo zawng zawngte chu beidawng mai lova ṭan la sauh sauh zawk turin a chah a ni.