Aizawl July 6, 2023 : Mizo Students’ Union (MSU) General Headquarters, Aizawl chuan vawiin-a Mizoram University hnuaia Under Graduate (UG) result chhuaka Mizo zirlai hlawhtlinna chang te thinlung takin an lawmpui a, hlawhtlinna chang zo lote pawh beidawng lova tan la thar zawk turin MSU chuan an chah bawk a ni.

MSU chuan Mizoram University Examination Department-in result an ti chhuak thei chu MSU chuan lawmawm a ti a, MZU buatsaih Bachelor Degree exam 2023-ah hian Bachelor of Arts-ah zirlai exam zawng zawng 5329 niin zirlai 4092 an pass a, pass percentage hi 76.79% a ni. 

Bachelor of Science-ah exam zawng zawng 605 niin zirlai 489 an pass a, pass percentage hi 80.83% a ni. Bachelor of Commerce-ah exam zawng zawng 401 niin zirlai 364 an pass a, pass percentage hi 90.77% a ni. Bachelor of Science (Home Science)-ah exam zawng zawng zirlai 36 niin zirlai 24 an pass a, pass percentage hi 66.67% a ni. 

MSU hian stream hrang hranga 100% pass nei thei, Arts Stream-ah Aizawl City College leh Faith College te, Commerce Stream-ah Govt. Champhai College, Higher & Technical Institute, Mizoram leh St. Xavier’s College te lawmpuina leh duhsakna an hlan bawk a ni.

MSU General Headquarters, Aizawl chuan kum tin a lo tih thin angin Under Graduate exam-a subject tina Mizo Topper-te leh College Students’ Union hruaitu pass zawng zawngte chu ni 20 July, 2023 hian Vanapa Hall-ah lawmpuina hun a hmang leh dawn a ni.