MSU in zirlai tithate chawimawi; Lalhmangaihzuali, Kawnpui hnenah MSU special award hlan
Tualchhung
Jun 07, 2022

June 7, 2022; Mizo Students’ Union (MSU) general headquarters, Aizawl chuan vawiin khan Chanmari YMA Hall-ah Mizoram Board of School Education (MBSE) buatsaih Higher Secondary School Leaving Certificate (HSSLC) Examination 2022 result tih chhuaha subject stream hrang hrang (Arts, Commerce & Science)-a Mizo top 3-te lawmpuina leh MSU special award semna hun an hmang.

ad

He hun MSU treasurer Lalramhluna Fanai kaihhruai, khuallian nia hmanpuitu education minister Lalchhandama Ralte chuan, All India service-ah Mizo hnam kan lang tlem tual tual tih sawiin, tan lak thar a ngaih thu a sawi. Mizoram state zirna chu India ram chhungah a hniam bik loh thu sawiin, "Syllabus, method, transfer & posting-ah pawh kalphung thlak hret hretin, NEP 2020 kalphung zawmin CBSE zul zuia kalpui a ni a, admission inchan loh avangin sawrkar sikul te extended ngaiin kan awm ta, tuna kan hahna leh buaina hi rimawi a ni,” a ti.

MSU aiawha thusawitu RK. Hnuna, vice president pawhin, zirna chu ram leh hnam thil a nih avangin, Mizoram hmasawnna tur atan dinhmun sang aiin chhawr tlak leh rin tlak ni tura zir chhuah a pawimawh thu a sawi. Zirtirtu indaih lohna nasa tak phuhruk tura MSU ngenna anga Mizoram sawrkar-in MR teacher leh SEDP teacher, mahni khaw mi leh sa ngei a la chu lawmawm a tih thu a sawi. MSU-in MRB hnuaia local language proficiency chungchanga hma a lakna kawngah management chhungah invauna a awm niin a lang tih sawiin, RK. Hnuna chuan, "MSU hmalakna dodaltute avanga staff pakhat tawrhna chu MSU tawrhna a ni a, a tul angin kan inpal ang," a ti bawk.

Vawiin hun hmanna ah hian HSLC distinction a pass, Lalhmangaihzuali, Kawnpui hnenah MSU special award hlan a ni a. Lalhmangaihzuali hi pian phunga rualbanlo niin, a kut khing vei lam chauh a hmang thei a, a kut ding lam chu a dâr bul thleng thangin, vei lam chu a kiu thleng chauh a thang bawk a, kut zungtang a awm mumal lo bawk a ni. Pianphunga rual a ban lohna vanga hnual lo va, tumruh taka a beih tang tangna leh hlawhtlinna chu zirlaite entawn tlak a nih avangin MSU special award 2022 hlan a ni.

MSU-in HSSLC Mizo Zirlai top-3 lawmpuina a hlante chu:
ARTS
1. Lalrohlui Ralte d/o Lalduhawma Ralte, Synod Higher Secondary School, Aizawl
2. Bethsebi Lalremkimi Pachuau, d/o PC Lalthangmawia, Mount Carmel School, Aizawl
3. V. Vanlalvenhimi d/o V. Lalsiamliana, Synod Higher Secondary School, Aizawl
 
SCIENCE
1. Singokhai Chozah d/o C. Thahe, St. Paul’s Higher Secondary School, Aizawl
2. Vanlalruata Fanai, s/o Vanlalrawna, St. Joseph Higher Secondary School, Aizawl
3. P. Lalmuansanga, s/o St. Paul’s Higher Secondary School, Aizawl
 
COMMERCE
1. Mercy Laltlansangi, d/o C. Zonunthara, Oikos Higher Secondary School, Aizawl
2. JK Lalchhanhima, s/o Johny Lalthanmawia, Oikos Higher Secondary School, Aizawl
3. Lalnunpuii Pachuau, d/o PC Ronald Lalnunsanga, St. Paul’s Higher Secondary School, Aizawl

Latest News & Chhiar Hlawh