ZALEN: July 23rd 2023: MSU te chuan Meitei te chu kutthlak tumna an neih loh thu an sawi a, ni 70 chuang a liam hnuah pawh Mizo an namnul rei tawh avangin rikrap si loa hriattir an duh zawk thu an hruaitute hming chuanna thuziakah tarlan a ni a. Meitei-te chu Aizawl to Imphal airlift an remti lo bawk a, chutihrualin Mizo hnam thinlung a na ve tawh takzet a ni tih hriattir an duh thu an sawi.

MSU hruaitute chuan, "Imphal-a zirlai awm, nu leh pa te chuan MSU thil tum leh rilru tak tak hre  chiang lovin, MSU min dem nghal viau mai thei a.  An fate himna tur an ngaihtuah em a, a awm viau a, kan hriatthiampui. Keini pawhin kan ngaihtuah reng a, kan ngaihthah reng reng lo." tiin an tarlang a.

"MSU hian Meitei kut thlak hi kan tum reng reng lo a, kan rikrap dawn tih thu pawh kan sawi chhuak ngai lo. A hun lohzia kan hre chiang a,  MSU thuchhuah avangin sawrkarin hmanhmawh takin Force a dah nghal ta si a, mipui leh Meitei a ti chiai zual sauh nghal a, MSU rilru lo takin thil a kal zawk a ni," an ti.

"Ni 70 chhungin kan unauten Meitei kut tuarin, min pawngsual a, min that a, min nghaisa a. Chuti chung chung chuan fimkhur takin kan awm zel a, zawldawh taka kan awm chung pawhin, kan unaute tawrh a nep phah chuang lova. Meitei te chuan Mizo hnam min namnul zual zel a, min hlau tawk lova, Manipur Zofate tuarna chu kan unaute ti chung siin, kan thlir tawp mai a," tiin tarlan a ni bawk a.

Mizo hnam thinlung a na ve tawh takzet a ni tih hriattir MSU chuan a duh a. Mizorama Meitei awm te'n nasa takin an state sawrkar leh mipuite ah pressure a pe tam ang a, Mizo hnam tih thinur a that lohzia te chu hria se an duh bawk a. Mizo hnam zahawmna vawnhim an duh a, namnul zel theih an nih lohzia kutthlak si lova, rikrap si lova hriattir ve an duh mai chauh tih an tarlang bawk.