Aizawl: S. Vanlaiphai to Muallianpui kawng cement concrete a chhun mek chu a ro chian hmain JAC lamin motor lian an zawh tir bakah motor pakhatah Rs 5000/- zel an la niin social media lamah a darh mek a, Muallianpui JAC leh contractor te chuan thiamthu sawiin hetihlai hian Mizoram PWD Engineer-in-Chief Er. K.Lalsawmvela chuan contractor harsatna tawh ang hi a la hriat ngai loh thu a sawi.

He kawng enkawltu contractor Zoramchhana chuan JAC lam hian hna thawk hlei thei lovin an siam tih a sawi a, PCC (cement) a kawng chhun chu a ro hmain JAC lam chuan sum la in motor an zawhtir niin Zalen a hrilh a. Kawng siam laiin motor ten an rah sak thin avangin a nih tur ang a nih loh phah thu a sawi bakah PWD te duhdan pawh ngai pawimawh lo leh an khaw tih dan anga hna hi thawk turin an hrilh thin niin a sawi.

Muallianpui JAC hi chuan kawng zawhtu motor te atangin sum an lak loh thu, hetiang thu an hriat loh thu Zalen zawhna an chhang a. Contractor chu a hnathawk te hnathawh dan pawh a hmuna rawn enpui turin vawi tam tak an sawm thin thu leh an sawmna hi a tih hlawhtlin sak ngai lem lo, tih Zalen an hrilh.

Contractor chuan a nih tur dik thlapin a thawk tih Zalen hrilhin PWD hotute lam duh dan angin a thawh thin thu a sawi thung a, khawtlang lam hian cement concrete ro hun chhung ni 28 pawh nghak duh lovin a char fel hun tura PWD te hun ruat hma in a cement chhun hi an cho thin niin a sawi bawk.

PWD Engineer- in-Chief Er. Sawmvela chuan contractor hian harsatna a tawh fo avangin an naute pawh a chhan te a zawh tir thin thu leh a harsatna tawh ang hi hmun dangah contractor ten an tawh a la hriat ngai loh thu a sawi a, contractor hian a hna hi chawlhsan mai te pawh a duh rum rum thin niin kan palai a hrilh bawk.