Aizawl: Mizoram Milk Producers' Cooperative Union (MULCO) chuan Covid-19 hripui leng vangin an bawnghnute siam chhuah an hralh tlem a, kum 2020-21 khan bawnghnute litre 17,20,763 lakhawm in litre 14,88,061 an hralh.

MULCO hotute hnen atanga ZALEN thudawn danin, Covid 19 hripui len hma 2018-19 chhunga society atanga bawnghnute an lak--khawm chu litre 24,18, 268 a tling a, hei hi kum hmasa 2017-18 chhunga an lakkhawm litre 21,20,847 aiin litre 2,97,420 zetin a tam zawk. Kum 2018-19 chhungin bawnghnute litre 20,08,030 an hralh a, hei hi kum 2018-18 a bawnghnute hralh litre 18,09,405 aiin litre 1,98,624 in a tam zawk. 

Sawrkar kum liam ta 2020-21 ah erawh Covid 19 hripui leng vangin bawnghnute lakkhawm leh hralh chhuah zat a tlahniam a. Kum liam ta 2020-21 in hrilen hma 2018-19 a bawnghnute hralh chhuah zat a phak lohna chu litre 5,19,969 a tling. MULCO report 2018-19 a tarlan a nih danin, MULCO hnuaiah affiliated society 33 an awm mek a, chung society ah chuan member 742 a awm a, chung zinga mi 356 te chuan MULCO ah bawnghnute an chhung. MULCO hnuaia member te bawng vulh zat chu 2225 a ni.

MULCO hian bawnghnute bakah, bawnghnute atanga siam Paneer, Dahi, Lassi, Dahi cup, Rasmalai, Rosgulla, Gulab jamun leh Ghee te an hralh thin bawk.