Goregaon, Mumbai-a Zirtawpni zinga in chhawng sariha kangmei nasa tak chhuakah mi pasarih an thi a, mi dang 40 velin hliam an tuar bawk.

Goregaon West-a Azad Nagar venga Jay Bhavani building-a kangmei chhuak hi zing dar 3:00 velah a ni tih Brihanmumbai Municipal Corporation (BMC) chuan an sawi a. Hliam tuarte hi damdawi in pahnih, HBT Hospital leh Cooper Hospital, Mumbai-ah dah an ni. 

Thi mi pasarih zinga pahnih hi naupang an ni a. Hliam tuar mi 40 zinga 12 chu mipa leh hmeichhia 28 an ni a, hmeichhe naupang a tel bawk.

“Goregaon, Mumbai-a kangmei chhuaka thi an awm tih hriat hi a hrehawm tak zet a. BMC leh Mumbai Police thuneitute nen inbiain puihna pawh pek an ni a. A tuartu chhungkua ka tawrhpui tak zet a, hliam tuarte pawh rang taka dam chhuak leh turin duhsakna ka hlan,” tiin Maharashtra Deputy Chief Minister Devendra Fadnavis chuan X-ah a tar lang.

Kangmei hian building hi kil tin atanga tuamin dawr, bungraw hlui dah khawm leh a hnuai bera lirthei hun zawng zawng pawh a kang chhe vek a ni.

A kan chhan hi hriat a la ni lo va, chhui zui mek a ni.