Aizawl August 18, 2024 : 17.8.2024 tlai dar 6:00 pm khan Jio World Drive, Mumbai-ah MIZORAM PINEAPPLE FESTIVAL, ni hnih awh tur chu Mizoram Horticulture Dept.hnuaia Josie's Kitchen buatsaih chu L.Lalhmingmawia Pachuau, Addl.Director of Horticulture chuan a hawng.

Mahminga chuan "Pineapple Festival hi Mizoram tharchhuah Lakhuihthei ngei India ram khawpui lian zawk a hralhchhuah anih theih nana thehlar tumna a buatsaih ani a, Sialhawk leh a chhehvel khua atangin Lakhuihthei Quintal 10 chuang he hun atan hian thawn thlak a ni," tih a sawi.

Pineapple Festival chhung hian Lakhuihthei thar hi zawrh chhuah reng a ni a, Lakhuihthei ei tur te, Juice leh Cocktail te mipui tan siam chhuah a zawrh nghal a ni a. Mizoram a tharchhuah tui leh țhat bik zia hi Bollywood ah vawrhlar tum a ni a. Hei hian Kuthnathawktute tan rah țha a chhuah ngei beisei a ni.

Pineapple Festival ah hian Lakhuihthei mai bakah Organic Stall, Handloom leh Handicraft leh Mizoram Start-ups te, MOM, Tuichangral FPO te leh thil dang dang stall te hawn tel ani a, Cheraw kàn bakah Zaithiam lar Lilac leh Young Fella te leh Designer lam ațangin Escape Engmawia, Fungki leh Tluangpuii Hmar te telin an kutchhuak an phochhuak a, Model Nunui Rualhleng leh a țhiante bakah Mumbai models ten Fashion show Ramp walk an nei bawk a ni. 

Horticulture Dept.in Stall neiin Lakhuihthei bakah, Dragonfruit, Mizo Chilli, Passionfruit, Anthurium, Grape-wine, Sawhthing leh Aieng te an phochhuak a, mipuiin an ngaihlu hle a, RELIANCE FRESHPIK hotu liante pawhin tlawhin Mizoram thil tharte hi lo pek anni a, an dawr India ram hmun hrang hranga zawrh tura indawr zui zel turin hmalak ani bawk a ni.

Mumbai DRC H.Lalruatliana leh a thawhpuite leh Mumbai Mizo awm ten an hlut hle a, N.E.atanga hnam dang unaute leh Mumbai a hnamdang hote pawhin Mizoram ațanga thil chi hrang hrang phochhuahte an hlut hle a ni.