Aizawl: Mizo Writers Association leh Art & Culture department tangkawp chuan October ni 25-28 inkar chhung hian Vanapa Hall-ah lehkhabu pho runpui an buatsaih dawn a, hemi hun chhung hian lehkhabu pho te chu man tlawm zawka hralh a ni ang.

Lehkhabu pho runpui neih tur chungchang hi sawiin nimin khan Mizo Writers Association hruaitute chuan Aizawl Press Club ah chanchinbumite an kawm a, MWA President R.Lallianzuala chuan, "Lehkhabu thenkhat hi a man pangngaia hralh tur anih laiin lehkhabu tam zawkah chuan a man tlawmin hralha ni dawn a. A hawn ni hian kum engemaw zat lehkhabu lei tur awm tawh lo, tunhnaia chhut thar leh te bu 30 vel tlangzarh a ni dawn a. Mizo zinga Padma Shri hmu hrang hrang te lehkhabu pawh phochhuah a ni dawn a ni," a ti. R.Lallianzuala chuan bookfest ah hian Mizo Academy of Letters in lehkhabu tha 'book of the year' an puan tawh lehkhabu te bakah Mizo Writers Association in lehkhabu lehlin tha an thlan te pawh phochhuah a ni dawn tih a sawi bawk.

Mizo Writers Association hruaitute chuan tun tum bookfest ah hian Mizo lehkhabu tha te chu an kim hle dawn niin an sawi a. Zawhna chhangin Covid len hnu hian Mizoten lehkha an chhiar nasa in lehkhabu chhuak pawh a pung sawt niin an sawi. MWA hian August ni 12-16,2019 khan hetiang bookfest hi an lo buatsaih tawh a, khami tum khan lehkhabu hralhna atang nuai 35 vel an hmu niin MWA hruaitute chuan an sawi bawk.