Myanmar buaina avangin raltlan 100 chuang lut leh

Admin - Sep 12, 2021

Chhungkaw 32 pawh an la tangkhang

Aizawl: Zirtawpni a Mizoram ramri bul Lunglerh khua a Chin National Front leh Myanmar sipai te inkahna thleng avangin nimin khan mi 100 chuangin Thiangsai an lut leh.

ZALEN in Thingsai VC te hnen atanga thu a dawn danin CNF leh Myanmar sipai inkahna avang hian Zirtawpni khan mi 47 te chu Thingsai khua ah an lut a, nimin tlai thleng khan mi 60 luh belhin kawng laka thang mek mi 40 chuang an la awm niin an sawi a. Heng mite bakah hian Tiau lui, Bung khaw kaiah chhungkaw 32 pawh an la tangkhang mek nia an hriat thu an sawi bawk.

Myanmar atanga raltlan lolut te hi Thingsai khawtlangin an chenna tura camp an siamah dah an ni a, mahse tunhnaiah mi engemaw zat an luhbelh leh avangin in ruak leh remchang lai laiah dah an ni a. Nimin lamah an luhbelh zel avangin community hall ah dah tum an ni a, raltlan lolut te hi quarantine hmasak zel thin an ni tih an sawi bawk.

Thingsai VC te chuan tuna raltlan lo lut te chu a tlangpuiin Thantlang, Lunglerh, Fungkah, Leisen leh Bung khua te an ni tlangpui tih sawiin an khua bakah Cherhlun, New Ngharchhip, Bualpui leh Hnahthial ah te an lut niin an sawi a. Tun hnaia raltlan lo lut te chu bungbel leh mutbu pawh nei lo an nih avangin khawtlangin vehbur an khawnsak mai niin an sawi.

Zirtawpni a inkahna hmun Lunglerh ah hian nimin lam chuan inkahna thleng a awm lo a, mahse vawiin lamah CNF te hian beih nawn leh an tum nia sawi a awm avang leh Lunglerh camp a Myanmar sipai tangkhangte tanpui tur hian Myanmar sipai thahnem tak kawng lakah an thang mek nia sawi a awm avangin mipui hi an thlabar zual niin Thingsai VC te chuan ZALEN an hrilh bawk.

Lungtian khua, Lawngtlai District, Mizoram pawh Myanmar raltlante Relief Camp buatsaihin nimin khan khawtlang huap hnatlang an thawk. Myanmar sawrkar sipai leh Myanmar Defence Force te nasa zawka an inkah leh tak avangin sahimna zawnga Mizorama lo lut an pung zel. A buai zual hma deuh khan mi 35 Lungtian khuaah hian an lut tawh a. Chhungkaw engemawzat lut tur in report tawh an awm.

Share now