November 1, 2022; Myanmar kuhva ro tawlh vangin, Hachhek tlangdung kuhva chingtu ten harsatna nasa tak an tawk mek a, hetihlai hian Bilkhawthlir leh Vairengte a kuhva chingtu lam chuan state pawnah an kuhva thar te hralh thei rih mah se, harsa erawh an tawk nasa hle tho.

Billkhawthlir Kuhva Chingtu Cooperative Society Ltd. hruaitute hnen atanga ZALEN thudawn danin, Bilkhawthlir leh Vairengte a kuhva chingtute chuan kum kal ta lam khan Myanmar kuhva ro vangin harsatna nasa tak an lo tawk tawh a, kuminah pawh hun engemawchen chhung state pawn a an hralh chhuah theih loh hnuah, kar khat kalta vel atang khan Lailapur check gate kaltlangin Assam ah an hralh chhuak thei chauh a, Kolasib DC, SP, bialtu MLA leh minister ah te an harsatna an thlen thin.

State pawnah an kuhva te hralh chhuak thei mahse, Assam lamin motor lian a phurh an remti lo a, motor te, bag 50 vel phur thei tur chauh an phal sak a, chu chu check gate ah awlsam zawk a endik vek a nih theihna tur a ni. 

"Myanma kuhva ro a tel ang tih an hlau a, unload a endik vek an duh a, chumi tur chuan kan kuhva leitu hnamdang ten anmahni sum an sen pawh a ngai thin," Billkhawthlir Kuhva Chingtu Cooperative Society Ltd. hruaitute chuan an ti a, "Tunah chuan kan fel leh rih tawh chuan kan hria a, engnge kan an leh zel dawn erawh chu kan hre lo," ti bawkin, Hachhek Bial Kuhva Chingtu Pawl ten hmalakna an neih mek pawh an thlawp tih an sawi.

Billkhawthlir Kuhva Chingtu Cooperative Society Ltd. hian nikum lam khan cheng nuai 800 man vel kuhva an hralh a, kumin ah nuai sang 1 man vel hralh theih an inbeisei a, kuva ching a eizawng chhungkaw 800 bawr vel an awm. Vairengte lamah pawh kuhva ching a eizawng chhungkaw 500 atanga 600 bawr vel an awm.