Aizawl January 7, 2024 : Chief Minister Lalduhoma chuan sawrkar laipuiin India leh Myanmar inkar ramri hung tura ruahmanna a siam chu an thulh a rin thu a sawi.

Chief minister hian nimin tlai khan CMO Conference Hall-ah chanchinbu mite kawmin tun hnaia New Delhi leh Kolkata a tlawh tuma a hmalakna sawiin, “MNF ministry hmasain Myanmar nen kan ramri hung tura a lo rawt vang kha nge ni ramri hi hung turin sawrkar laipui chuan ruahmanna a siam a. Mahse, ‘ramri hi barluih ramri a ni’ tiin kan pawm loh thu kan sawi a. ‘Ramri hung hi in ti tur a ni lo, in tih luih chuan barluih ramri hi in pawm tihna a ni ang’ kan ti a. Min pawmpui viau niin a lang a; chuvangin, ramri hung tura ruahmanna an siam hi an thulh ka ring a ni,” a ti.

Raltlante chhinchhiah tura ruahmanna chu India policy a nih avangin keini chauh awl bik kha a rem lo tih sawiin, “He thil hi raltlante thawn haw tumna lam a ni lo a, an tan hlauhthawn tur a awm lo. Tuna raltlante hi an ram a ralmuan a, hawn ngam a nih hma chuan kan hawtir dawn lo a ni,” a ti.

Chief minister chuan union road transport & highway ninister hnenah NHIDCL-in ram environment a tihchhiat dan a thlen tih sawiin, “Tun ang an tal hi kan sawrkarah chuan kan remti dawn lo a ni,” a ti a. Mau chungchang sawi bawkin, “Mau hriak sawrna din tumin hma kan la mek a, kan ram mau zinga zaa pali (4%) hi Mamit district-a awm a ni a, hetah hian bultan kan tum a. Bairabi-ah ram kan hual tawh a, kan ram maute hi a nih ang anga hman tangkai dan kan dap dawn a ni,” a ti bawk.