Aizawl: Chief Minister Zoramthanga chuan, “Myanmar ram buaina avanga Mizorama rawn tlanlutte hi duat takin kan enkawl zel dawn a. Pawisa pawh a tul dan angin kan pe chhuak zel ang,” a ti.

Nimin khan Khawzawl khuaa amah lo hmuaktu party mipui kalkhawmte hmaah thu sawiin Zoramthanga chuan, “District headquarters thar pathumte hi MLA inthlan leh atang chuan an khaw hming ang zela constituency hming pu tawh turin constituency hming thlak rawtna Election Commission of India-ah thlen kan tum a. Constituency ramri pawh hi a kikawi hlawm em avangin her danglam a tul kan ti viau tawh a ni,” a ti a. Ayodhya Temple sakna tur Mizoram sorkarin pawisa thawh ve anga sawi chu dawt a ni tih a sawi bawk.

ZPM chungchang sawiin Zoramthanga chuan, “ZONET leh Vanglaini hi nei lo ta se an ral ti tih tawh ang. An khuangpui rinrawl ber leh an tawtawrawt ri hi a chuai tial tial a. An thupuan mipuiin awih chin tawk an nei tawh a ni,” a ti a. Congress party chu an buai hle nia sawiin, “MLA ni lai leh an MLA hlui eng emaw zat chu Congress chhuahsan mai turin an nghing luai luai tawh a. Kum 2023 MLA inthlanpui neih leh turah pawh hian an ‘Arte lukawn’ hial mai thei a ni,” a ti a. MNF party Pathianin mal a sawm tih sawiin, “Serchhip bial by-election ah Pathian leh mipui zarah hnehna chan ngei kan inbeisei a. MNF Sorkar hi tih ngheh sauh sauh a ni zel dawn a ni,” a ti bawk.