Aizawl: India leh Myanmar ramri, Lawngtlai chhimthlang lam, Laitlang leh Varang dai vela kum 2017 kum tawp lam atanga Myanmar sipai (Matatdaw) leh Arakan Army te inkahna avanga India rama Myanmar khua leh tui (Zakhine) raltlan, Hmawngbuchhuah leh a chhehvela inbengbel ta te chu anmahni ram, Myanmar lama thawnkir tura hma lak mek niin nimina thawn kir tumte chu raltlan an hmuh chhuah belh vang leh khua in a bumro vanga thulh rih niin Zalen chuan thu a dawng.

June 11, 2019-a Chief Secretary hova sorkar leh CYLA meeting ruahmanna ang chuan heng raltlan te hi June ni 15, 2019 (Inrinni) hian Myanmar rama thawnlet tura tih niin, First Assam Rifles Commandant kaihhruaina in Myanmar ramri thlenga hruai an nih hnu-ah Myanmar sipai ten an lo dawngsawng ang tura ruahman a ni tawh a. Nimin lam khan khuain a bumro avangin hmalak hleih theih a ni lo a, “ Kea thui taka kal te a ngaih avang in human right lamah thiam chan loh theihna a awmin ngaih a ni bawka, sawn hlat hrih a ni,” tiin thudawnna chuan a sawi.

Mizoram sorkar leh Central YLA te hmalakna in tunkar Ningani khan heng raltlante hi an chenna inah kal chilhin raltlan la chambang zat enfiah hna hna uluk ta neih a ni a. DC office, CYLA leh sawrkar hnathawk dang te an kal bakah Hmawng buchhuah a Assam Rifles tean tel bawk a ni.

Heng hmalakna atanga a landanin tunah hian Hmawngbuchhuah-ah hian Myanmar raltlan, Hmawngbuchhuah a in leh lo dina khawsa mek hi in 54 awm in, raltlan mi 219 anla chambang mek ani tih hmuhchhuah a ni a, thawnkir chuk chuk tur chuan hmalak nghal mai a buaithlak niin thudawn a ni bawk.

Hetihlai hian heng raltlan zinga a tam zawk chuan Myanmar a let leh hi an duh loin an tum lo hle a, Myanmar-ah hian chhungkaw khaw sakna tur leh damkhawchhuahna khawp a hnathawh tur a awm loh thu leh khawsak a harsa an tih thu an sawi a, chutih rual chuan Myanmar a let leh tur hian an ram chu a ralmuang thawkhat tawh niin an sawi bawk.

Hetih mek lai hian heng raltlan zinga mi eng emaw zat chu Budhgaya Foundation, Delhi lamah chhukthla in an khawsa mek niin raltlan zinga an chhung leh khatte chuan an sawi.