ZALEN January 3, 2023 : Sawrkar laipui chuan Myanmar ramri-a Free Movement Regime (FMR) hman mek chu tihtawp a tum hnai niin sawi a ni. Ramri a aw, India rawn lut duh te chuan visa an mamawh thuai dawn niin sawrkar hnathawk senior tawh tak chuan a sawi. India leh Myanmar ramri Km 300 zeta thui chu hung phawt a ni dawn tih official hian a sawi a, tender pawh koh thuai tum a ni, tiin Drone hmangin ramri hi survey vek a ni tawh a ti bawk.

Hung tum a nih chhan hi helna avanga te, Smuggling leh ruihhlo insumdawn tawnna a nasa vang nia ngaih a ni. Hetianga thu a than mek lai hian Nagaland leh Mizoram chuan he ruahmanna hi an dodal ngei a rin thu official hian a sawi, "Border security hi centre-in a ngaihpawimawh ber chu a ni. Anni thu lam hi chu ka la lem lo ang. Mahse, thutlukna tak tak chu Union Government a ni. Myanmar lam nen inbiakna kan nei reng a ni," a ti.

India leh Myanmar te hi ramri hung lova hun rei tak lo inthenawm tawh an ni a, India leh Myanmar hian KM 1,643-a thui ram ri an nei a, Mizoram, Manipur Nagaland leh Arunachal Pradesh te chuan Myanmar hi an ri vek a ni, heng ramri lehlam leh lehlama awmte hi inchhung hnai leh chi inhnai tak an ni a, 1970 khan inremna siam niin inkalpawh phalsak an ni a, 2018-a Act East Policy siam a khan he inremna hi ennawn leh a ni bawk.

Mizoram ah hian February 1, 2021 a sipai chakna hmanga mipui thlan Myanmar Sorkar paih anih hnu khan sipai sawrkar duh lo hel pawl (anti-Junta rebels) sang eng emaw zat an lut chhuak tawn vela ngaih a ni. Mizoram chhung hmun hrang hrangah sipai sawrkar din tak avanga raltlan sang tam tak an awm mek a ni. Mizoram hian Myanmar nen ram ri 510 km a thui a nei.

Manipur hian Myanmar nen hian 390 km ram ri a nei a, 10 km vel hung a a ni tawh. Nikum 2023 July thla khan Myanmar ațang hian dan loa an state-a lut (illegal immigrants) 700 an awm thu an sawi tel bawk.

Arunachal Pradesh hian Myanmar nen ram ri 520 km a nei bawk a, Nagaland pawhin 215-km a thui ram ri a nei bawk.