ZALEN January 17, 2024 : Myanmar Sipai sawrkar leh Mipui sipai te inkahna kal velah vawiin khan Myanmar Sipai 278 te chuan Parva, Lawngtlai district an rawn lut leh tawh a ni.

Myanmar ramchhung, Lawngtlai District, Parva piahlam a Myanmar Sipai leh Mipui Sipai te inkahna vanga Myanmar Sipai tlanchhia 278 chuan vawiin tlai dar 4 vel khan Lawngtlai District chhung, Bandukbanga an lut a, Assam Rifle ten an buaipui mek tih ZALEN chuan The Lawngtlai Post atangin a dawng.

The Lawngtlai Post in ZALEN a hrilh danin Myanmar Sipai leh Mipui Sipai te hi Myanmar ramchhung Karma lui-ah an inkap a, Myanmar Sipai te hi tlanchhiain, Lawngtlai District ah an lut ta a ni.

Myanmar Sipai hi rawn luhbelh tur an awm leh awmloh tun dinhmunah hriat maitheih a nilova, luhbelh erawh an awm a rinawm niin kan thudawnna chuan a sawi a, Myanmar Sipai te hi Sipai thuam famkim nen Mizoram-ah hian an rawn tlanlut an ni.

Tualchhung buaina avanga sawrkar sipai leh hnambil sipai te inkahna avang hian Myanmar sawrkar sipai te hian tlanchhiatna atana Mizoram hi an hmang ta fo a, Champhai district leh Lawngtlai district te chu tun dinhmunah chuan an himna atana an pan ber an ni rih a, heng sipai sahimna zawng te hi India sawrkar chuan helicopter hmangin an himna tur hmunah an phur thleng thin a ni.