Aizawl: Dr Vanlaltanpuia, Chaiman MYC chuan Inrinni khan Shilong-a Mizo Zirlaite Inter-College Debate hun a hmanpui bakah mi pawimawh te kawmna hun a nei.

MYC chairman hian zirtawpni khan St Anthony's College, Shillong-a Mizo Student Union ten St Anthonys Mizo Department leh Mizoram Youth Commission nen tangkawpa Debate, 'Active participation of the youth in politics is necessary for the transformation of nation and society' tih thupui hmanga St Anthony's College Auditorium Shillong-a buatsaihah khuallian niin hun a hmanpui a, Shillong-a College hrang hrang 9 atanga mizo zirlaite kalkhawm hmaah thu sawiin, zirlaite chu ram leh hnam tana theihtawp chhuah tur in a sawm a, All India Services ah te lut thei tura bei turin a ngen. Zirna tluang panngai mai piah lama, IIT leh IIM leh proffessional course hrang hrang a zir thei tura in chher hriam tur in a fuih a ni.

He Inter college debate-ah hian Shillong a College 9 atangin inelna neih a ni a, Speaker atan B Lalruatpuia, Asst Prof. ICFAI, Aizawl hman a ni a. College ti tha ber St Edmunds College niin pahnihna chu Union Christian College an ni a, pathumna chu St Dominic College an ni. Best Debator ah Samuel L Tlau St Edmunds College thlan ani a, Best Humorous Debator ah Rammuanpuii, Womens College thlan a ni bawk.

Indian Council of Cultural Research Regional Director, Dr Munish Singh nen Mizoram House ah in hmu in Mizoram-a ICCR nen tangkawpa Event kumin kum tawp lama buatsaih chungchang te an sawi dun a, Cultural Exchange Programme, Korean Cultural Exchange Centre New Delhi, MYC leh ICCR te nen tangkawpa buatsaihna tur a hmalak dan tur an sawi dun bawk.

NEC Secretary K. Moses Chalai, IAS leh L.Beimopha IRS Deputy Secretary chu an Office ah a hmu bawk a, NEC in Covid 19 hripui leng avanga Reverse Migrant Workers te tana Skill Training buatsaihna tur a sum a pek avanga lawmthu hrilh pah in Mizoram Youth Commission mamawh te a thlen nghal a ni.