Aizawl February 17, 2024 : Mizoram Youth Commission chairman Malsawmzuala Ralte chuan Zirtawp zan khan Chanmari YMA Hall-ah, "Mahindra XUV 300 LPS Cup 2024 inter village football" tournament a kick-off.

Malsawmzuala Ralte chuan thu sawina hun hmangin Tournament lian, ram pum huapa buatsaih chu player tha, thiamna nei la inthup a, la lar lote inpho lanna hun remchang a ni thin a ti a Tun hmain mizo footballer tha tak tak, discipline that loh avanga an nih tur ang ni pha ta lo an awm fo thin tih sawiin, ruihtheih thil leh insum theih lohna avanga thleng sang ta lo pawh an tam, a ti.

Thawhrimna leh taimakna hi hlawhtlinna a nih thu sawiin, a bak kawng dang a awm lo va, short cut a awm hek lo, a ti a. Inter-village football tournament khel tur zawng zawngte chu hma lam huna hlawhtlinna sang zawk nei thei tura thawkrim turin a fuih a ni.

MYC Chairman chuan eng kawngah pawh hnathawhna, zirna leh infiamnaah pawh ni se, time table mumal tak siam a, a hun tak zela thil tih hi hlawhtlinna a ni, a ti bawk.

Er. Lalzawmthanga, President ADFA in inlawmna thu a sawi a, Lalbiakthanga Khiangte, IPS, adviser ADFA chuan fixture a tlangzarh a, a khel tur team aiawh eng emaw zat an kalkhawm a ni.