ZALEN December 2, 2024 : Vawiin khan ZPM General Headquarters chuan Party Office-ah chhung inkhawm kan hmanga he huna thusawitu MYC Chairman Malsawmzuala Ralte chuan ZPM in sawrkarna a siam atanga hun reilote chhungin thalai thahnem takin MYC hmalakna kaltlangin mi 41 ten hna an hmuh tawh thu a sawi.

Malsawmzuala Ralte chuan, “ZPM sorkarna hnuaiah MYC chuan theihtawp chhuahin thalaite tan kawng sial a, malsawmna ni turin hma a la a ni,” a ti.

Mala chuan, “Mizoram University incubation centre-te nen thawk hovin December thla chhung hian Enterpreneurship Development Centre MYC office-ah din turin hma kan la chho mek a, tin, livelihood business incubator buatsaih kan rel bawk. India leh Taiwan-in hnathawk tur lak luh kawngah inremna an siam bawhzuiin tunah hian mizo nula 2 ten August thla atang khan Taiwan-ah Chinese tawng zirin an awm mek a ni.”

“Honda company-te nen thawh hona thuthlung kan ziak a, an CSR hmangin sum an rawn thawh a, chu chuan hotel management training MYC office ah batch 1 na kan zo tawh a. Mizo thalai 26 in training zovin an training lai hian India ram hmun hrang hranga 4 star leh 5 Star Hotel-ah hna an hmu vek a ni. Tunah hian batch 2 na class kal pui mek a ni a, Lunglei Youth Centre-ah 20 vel, Aizawl-ah 20 velin an zir mek a. January thla lai hawl velah an zir zo ang a, hna an hmu leh vek turah kan ngai,” a ti.

Malsawmzuala Ralte chuan, “Indigo Arlines leh Air India te nen thawhho dan tur kan sawi ho mek a, Air hostess hi hmeichhe tan chauh a nih avangin mipa rawn dil ve tum an awm nual a, anni hian ground crew kan la leh thei a nih chuan an dil ve thei dawn a ni. Tin, TATA Trust te nen pawh kan indawr mek a, kan intih fel chuan hotel a thawk tur front office assistant, house keeping ah te training tur kan la ang a, Guwahati ah an training thung ang."

"Staff Selection Commission (SSC) leh Banking-ah coaching class hawn a, mizo thalai a tam thei ang ber an luh theihna turin ruahmanna kan siam a ni. Kumin chhungin ZPM sawrkarna hnuaiah, MYC kaltlangin mizo thalai 41 ten hna an hmu ve tawh a, MP inthlan model code of conduct in min phuar chhung kha rei hle lo se chuan, hei ai hian an tam ngei ang. MYC kaltlanga hnathawh tur hmu zat hi an pun chhoh leh ngei kan beisei a ni,” a ti bawk.