Aizawl : Tun hnaia UPSC Exam-a hnuhma nei tha bera chhal ngam Vision IAS leh Mizoram Youth Commission te chuan vawiin khan thawhhona thuthlung ziak turin inbiakna an nei.

Vawiin khan MYC Conference Hall-ah MYC Chairman Dr. Vanlaltanpuia hovin inbiakna hi neih a ni a, hetah hian Vision IAS aiawh te chuan an zirna kalphung te an sawi a, UPSC exam hnuhnung berah khan top 10-ah mi sawm an hnen zir atanga tling an awm thu leh kum hmasa lam khan top 10-ah mi pasarih an tlin thu an sawi.

UPSC-ah hian zirlai 700 chuang exam pe thin an neih thu leh an classroom programme hi mi 7,000 chuangin an chhim thin thu an sawi a,  Vision IAS hian Test series an neih thin chu mi 70,000 chuang an pek thin thu leh heng te hian online leh offline hmanga test an pek thin an ti.

Vision IAS te chuan UPSC exam hnuhnungberah khan top 100-ah mi 70 chuang an awm thu an sawi a, class hi June thla atanga tan thin a nih thu leh thla 11 chuang zirtirna an pek thin thu leh an zirlai te chuan UPSC exam an pek hma in exam tum thum an hmachhawn thin an ti a, hei hi UPSC kalphunga neih thin a ni.

Expert mi 200 rualin an vil reng Vision IAS hi India rama hetiang lam zirna zinga zirlaite zir tur chhawpchhuah sak tha bera sawi an ni a, an naupang te dinhmun pawh internet kaltlangin an vil reng a, an zirlaite dinhmun pawh nu leh pa te leh anmahni tur te tana hmuh theih vek a ni bawk.