Aizawl: Nimin Inrinni chhun dar 12:00 khan MZP General Headquarters chuan College S.U leh hnampual hruaitu degree nei tharte lawmpuina leh chawi-mawina hun hman a ni a, Pu C. Lalrinsanga, Minister chu khuallian niin a hmanpui. He hunah hian naupang rukbo chhanchhuaktu Caroline Malsawmtluangi leh Tv. Johny Laltlanmawia, Mount Everest, Summiter te chu chawimawina hlan an ni bawk.

Khuallian Agriculture Minister chuan, “MZP-ten chawimawi phu leh pawl inhmang chunga degree tha tak nei theia awmte hi fak an phu. MZP ten hmalakna an neih, tute emawin an huang lo tia sel chang awm mah se, kan hnamin a hlawkpuizia leh rah tha a chhuahna hi Zofate hian kan theih-nghilh tawh dawn lo. Zirna uar tur leh zirlaiteah phurna pe thintu MZP-ten kan ram leh hnam damna atan thiamna hlutzia an hria, Mizo zirlai a chawimawi thin hi rah tha a chhuah mek bakah Civil service thlenga hmasawnna kan hmuh ngei ka beisei a, chutiang chu zofate thluak hian a pha a ni,” tiin, chawimawite a fuih.

He huna thu sawitu dang L. Ramdinliana Renthlei, MZP President chuan, “Vawiina MZP chhungkua atangin degree nei thar heti zat chawimawi tur kan nei hi a lawmawm hle a. Tin, Mizote thang min chhuahpuitu, khawvel tlangsang ber Mt. Everest lawn chhuak chawimawi tur leh zirlai huaisen chawimawi tur kan nei hi a lawmawm hle a, an chungah MZP chu kan lawm hle a ni,” a ti a.

L.Ramdinliana Renthlei chuan, “Zirtirtu sem rual a nih theih nan MZP chuan theihtawp chhuahin hma kan la thin a, kan Sorkar hrawn tawh apiang hian an thei lo zel. Zirtirtu aikal la hi kan duh lo hle thin a, kumin kum tir chho a, MPSC kaltlanga zirtirtu lak tharte an awmna tur sorkarin an tifel a. Thingtlang zirtirtu indaih lohna khuaah an dah a, joining report an pe a, aikal lak an tum nghal deuh vek ringawtte kha a tha lo hle a ni. Tunah sorkarin Primary leh Middle school zirtirtu tur thahnem tak lak a tum mek a, a khaw mi ngei zirtirtu atana training thlap tawh lak a tum hi MZP chuan lawmawm a ti hle a; amaherawhchu, zirtirtu training lo lak a nih chuan MZP chuan a dodal tlat dawn a ni,” a ti bawk.

MZP hian Aizawl khawpui chhunga College Students’ Union leader, Hnampual leh MZP chhungkua mi 63 leh June 12, 2019-a naupang rukbo chhan chhuaktu, Caroline Malsawmtluangi, kum 11, Zuangtui, Aizawl leh May 16, 2019 zing dar 7:05-a khawvel tlangsang ber lawn chhuak, Tv. Johny Laltlanmawia, Ramhlun Veng te chu chawimawina thuziak hlan an ni.