Aizawl : Ramri humhalh nana hma an lakna kal zelah tun hnai khan Bairabi bul Zophai-ah Mizo Zirlai Pawl (MZP) chuan Chawlhbuk sak an tumna hmunah signboard an tar a, he an thil tar hi an tar zanah a bo leh nghal a, FIR pawh thehluh a ni. Hetih lai hian Bairabi khawtlang lam chuan chawlhbuk sak hi an duh lo.
Zophaia MZP-ten Chawlhbuk sak an tum avang hian buaina a lo chhuak tawh a, sak tuma thawkchhuakte mai bakah chanchinbu mi te thlengin Assam Police kut an tuar a, a tawpah inremna mumal lutuk awm lem lovin an intha then thei hram a. MZP chuan Chawlhbuk hi sak ngei an tum thu an sawi reng a, hei hi a chhan ber nia lang chu sawrkar lam hian ramri chingfel thuai se an tih vang a ni ber a, tunhnaiah pawh Chawlhbuk hi sak tumin hma an la leh a, an sakna hmun turah signboard pawh an tar a, mahse, an thil tar hi a bo thung a ni.
Chawlhbuk sak an duh loh chhan a sawi naah Bairabi North YMA president V.L. Malsawma chuan, “Ramri humhalh hi duh lo kan ni lo. Mahse, sawrkar hian hma an la tak tak si lo a, buaina kan ngah phah mai mai a ni. Inner Line Regulation anga Mizo ten hun rei tak atanga kan ram anga kan cheibawl tawh, vai te chhawra leilet kan siam-ah te hian buaina kan tawh phah vek tawh a ni. Tunah chuan kan buh thar pawh police venhimna hnuaia kan lak a ngai hial, boruak tha tak hnuai thil ti thin kha ralti takin kan awm phah ta zawk a ni. Kan leilet vai te pawhin buh min rawn pe tha duh tawh lo,” a ti.
Bairabi North YMA president hian a sawi zel dan chuan, "Tun hma lam kha chuan Agriculture product lak kawngah hi chuan harsatna ka nei ngai lo. Teak leh thing lamah hi chuan a khirh sa hrim hrim. MZP issue atang khan thil hi a buaithlak zo vek a, pangngai taka nun theih laia boruak chhe zawnga thil kal leh tur hi kan duh lo. Mizo lam chan hi a chhe zawk zel a ni. Sawrkar hian kan thlavang a hauh ngam tak tak lo a, kan tawlh zawk zel a ni," a ti.
MZP lam hian Chawlhbuk hi sak ngei chu an tum ruh hle a, hma an la mek. Bairabi lamah hian he hmalakna hi pawmpui lo tu an awm rualin, sak ngei duh thahnem tak an awm niin an sawi a, MZP headquarter lamin kaltlangpui lo mah se, Bairabi sub-headquarter MZP lam chuan sak an tum tho, tih an sawi. Bairabi lam atanga sa lo tura ngenna chungchangah MZP vice president B. Vanlaltana chuan, "A mak khawp mai, nikuma ban khur min laih puia phur em em te khan tunah chuan min do ta tlat mai. Nikum boruak avanga khan central sawrkar thlengin ka ko ei thei a, Assam sawrkar leh Mizoram sawrkar te nen lam inbiakna pawh tum thum kan nei. Zophai velah tak phei hi chuan ramri-ah buaina a awm lo a, Phaisen vel inremna kan nei thei lo a, thil hi a sukuk laklawm mai a ni. Tunah hian core committee pawhin document la khawm tura min tih angin Chief Secretary hnenah pawh kan thehlut tawh, hma kan la chho mek zel a ni," a ti.