Aizawl June 3, 2024 : Mizo Zirlai Pawl (MZP) General Headquarters, Aizawl Executive Committee meeting vawi 631 (2023-2025 term-ah vawi 9) na chu vawiin khan MZP Conference Hall-ah an thukhawm a. School zirlaibu chungchang, dentist Document lem chungchang leh MZU hnalak chungchanga te an ngaihtuah.

Meeting chuan, tun hma atanga zirlaiten harsatna an lo tawh fona, Zirlaibu sem chungchang ngun takin a ngaihtuah a, a hun taka zirlaiten an zirlaibu an dawn theih nan a tul anga hmalak a, enzui nise an ti.

MZP chuan Mizoram Sawrkar hnuaia Dentist (Ha doctor) hnathawk zingah document lem hmanga hna hmu an awm ngeiin a hria a. He thil hi enzui a, chhui chiang turin leh a tul anga hmala turin MZP chuan Health Minister a ngen a. Sawrkar hmalakna hi June 21, 2024 (Zirtawpni) thleng a ngaichang dawn a ni.

Mizoram University (MZU) hnuaia Group B leh C post hrang hrang hna lak tura written exam pek vek tawh, thla kua (9) ral hnuah pawh result la tihchhuah loh avanga thalai hna zawng mekte manganna chu a ngaihtuah a. MZU hotute biak pawha, enzui sak zel nise a ti bawk a ni.  

Meeting chuan Zofate hnam inkawmpui lian "Zofest 2024" vawi-10 na thleng turin West Phaileng a ruat nghal bawk.