ZALEN November 30, 2023 : Mizo Zirlai Pawl (MZP) General Headquarters, Aizawl chuan vawiin November 30, 2023 chhun dar 12 khan MZP Conference Hall-ah Executive Meeting vawi 625 na (2023-2025 term-ah vawi 3 na) an nei a. Job fair chungchang, Nationalism & Career Awareness campaign chungchang leh pawl chhung thil te rel a ni.

Meeting hi MZP President H Lalthianghlima'n a kaihruai a,

December 13, 2023 hian NIELIT Aizawl te nen tangkawpin Aijal Club Park-ah Job Fair buatsaih nise a ti a, he hunah hian zirlai a tam thei ang ber an tel theih nan hmalak tha an ti bawk.

Meeting chuan ram leh hnam hmangaihna kawnga thalaite harh thar nan leh hna zawnna kawnga thalaite inhrilhhriat nan ram pum huapin Nationalism & Career Awareness campaign neih a rel a. MZP Pisa Pui khar hun atan December 15, 2023 an ruat bawk.

MZP chuan ram leh hnam him zawk nan hnam dang dan lova Mizoram-a eizawngte dapchhuah kawngah nasa takin hma a la thin a, hetiang hunah hian ram hruaitu leh mi pawimawh zingah hnam dang thlavang hauh an awm thin chu MZP chuan pawi an ti a, an dem tih an sawi. MZP chuan ram leh hnam him zawk nan a ni tih hriaa MZP hmalaknate thlawp zel turin mipuite an sawm a. Ram hruaitu hnam dang thlavang hauh ching an awm chuan an hming an puangzar hreh dawn lo tih an sawi bawk

Meeting-ah hian MZP President H Lalthianghlima chuan MZP Calendar 2024 a tlangzarh nghal bawk a ni.