Aizawl January 23, 2024 : Mizo Zirlai Pawl (MZP) General Headquarters, Aizawl Executive Committee meeting vawi 627-na chu vawiin khan MZP Conference Hall-ah an thukhawm a, Zirtirtu aikal la leh mahni post a awm lo te chungchang, Free Movement Regime (FMR), Myanmar sipai India rama lo tlan lut chungchang an rel.

Meeting hi MZP President H Lalthianghlima'n a kaihruai a, Zirtirtu aikal la leh mahni post a awm lo te chungchang a ngaihtuah a, Mizoram sawrkar-in zirtirtu aikal lak titawp tura a hmalakna chu tha tiin an thlawp tlat a, Education Minister Dr. Vanlalthlana pawh chak taka hma la turin a ngen nghal a ni. MZP chuan February 10 ral hma ngeia aikal la leh mahni post-a awm lote chu MZP General Headquarters-ah report turin a hnuaia Headquarters, Sub Headquarters leh Branch te a hriattir a, February thla ral hma ngeia chingfel turin hmalak an tum a ni.

India leh Burma ramria zalen taka inkalpawh theihna, Free Movement Regime (FMR) thiah tumna awm chungchang pawh ngaihtuah niin, Mizo hnam inpumkhatna leh inunauna tichhe thei tur a nih avangin a tawp thlengin dodal zel nise tih a ni.

Meeting chuan, Bangladesh atanga an sa himna zawnga rawn raltlante Central force ten an lo dan fo laiin, Myanmar-a zofate tibuaitu ber Myanmar (State Administration Council) sipaite zalen takin an ralthuamte nen awlsam takin ramri an rawn kan fo chu tha lo a ti a. Civil mi tanpuina mamawha lo lutte laka an khawng em em lai a, buaina siamtu ber Burma sipaite a ngaihsak leh duat taka an thawn kir fo chuan an mit a ti kham an ti. Mizoram-ah Myanmar SAC sipaite hi lo lut tawh lo turin meeting hian an duh a ni.