Aizawl July 5, 2023: Mizoram Legislative Assembly Secretariat chuan hna an lak chungchangah thuchhuah an siam a, Exam a marks leh mahni answer paper-te pawh a duh tan RTI hmanga dil theih reng a nih thu an tarlang a, dang ang thlapa hna hi lak anih avangin cancel thei an nih loh thu an sawi. MZP leh MSU chuan Assembly House kawtah hian lungawilohna lantir an tum chu kaltlangpui an tum thu ZALEN an hrilh.

MZP President chuan ZALEN zawhna chhangin MZP leh MSU ten joint meeting-a an lo rel tawh angin July 6, 2023 ral hmaa Mizoram Legislative Assembly Secretariat ten appointment an cancel lo anih chuan lungawilohna lantir an tum thu an lo sawi tawh chu kaltlangpui an tum thu a sawi. 

Mizoram Legislative Assembly Secretariat chuan hna hrang hrang lak chungchanga pawl thenkhatin hma an la hi thil tha duhna a nih avangin lawmawm an ti a, Nimahsela, an duh dan anga appointment hi cancel leh a nih chuan dan ang thlapa lak an nih avangin an mi lak te chu Court-ah kal se Secretariat lam hian kan hneh dawn lo a. Hei vang hian cancel leh chi-ah kan ngai lo a ni, an ti.

Exam a marks leh mahni answer paper-te pawh a duh tan RTI hmanga dil theih reng a ni, an ti bawk. 

Mizoram Legislative Assembly Secretariat chuan Indian Constitution Article 187 hnuaiah Secretarial Staff hrang nei tura tih a ni a, Recruitment Rules leh Service Condition pawh he Article hnuai veka thuneihna nei a nih angin, tha a tih angin a kalpui thin, an ti.