Aizawl July 4, 2023 : Vawiin khan MZP General Headquarters leh MSU General Headquarters Office Bearers te chuan MSU Pisa Pui-ah Joint Meeting an nei a, tunhnaia Mizoram Legislative Assembly Secretariat hnuaia, Translator, Assistant, Lower Division Clerk (LDC) leh Upper Division Clerk (UDC)) hna lakah thil fel tawk lo leh chhungkhat laina, vua leh vang induhsakna awm anga thuthang chungchang an sawiho. Assembly Secretariat thuneitute chu July Ni 6, 2023 ral hma ngeia hnalakna order cancel vek turin an ngen.

Joint Meeting-in a rel angin Mizoram Legislative Assembly Secretariat hna lak dan kalphung leh hnalak dan document te zirchiangin an endik a. Assembly Secretariat Commissioner & Secretary chu a office-ah an hmu nghal. Thil awmdan an zawhfiah hnuah hnalak kalpui danah thil fello a awm ngeiin an hria a ni.

Joint Meeting chuan Assembly Secretariat thuneitute chu July Ni 6, 2023 ral hma ngeia hnalakna order cancel vek turin an ngen a. Ni 6 hmaa hnalakna order cancel anih loh chuan Mizoram Legislative Assembly Secretariat office kawtah zirlai punkhawm nise a ti a. Zirlai pawl joint meeting ngenna hi zawm ngei turin thuneitute a beisei a. Zirlaite dikna chanvo humhalh anih theih nan a tul angin Zirlai pawl joint meeting chuan hma a la zel dawn a ni.

Joint Meeting chuan Zirlai lehkhathiam tling leh tlak ten an thiamna phu tawk an hmuh theih nan leh dik leh felfai taka hna an hmuh theih chu an duh ber a a nih thu an sawi a, Zirlai hna zawng mek te ti beidawng zawnga hnalak kalpui a ni chu hriatthiam har an tih thu leh mawhphurtute an dem. Mizoram chhung hna lakah thleng nawn tawh lo se a duh tih an sawi a ni.