Aizawl: Aizawl Smart City Ltd. MZP Inter High School Quiz 2022 kharna chu Zirtawp zan khan Ignite Studio, Khatla-ah neih a ni a, St. Paul's Higher Secondary School chu pakhatna an ni. 

Quiz kharna huna khuallian Health Minister Dr. R. Lalthangliana chuan, "Kan khawvel hi a thawkrim leh taima, mi vantlang chunglam te tan lo chuan a harsa em em a. Chuvângin, tih tak takna nen, a nawlpui aia sang nih in tum loh chuan hlawhtlinna a awm lo," a ti. MZP President Lalnunmawia Pautu pawhin thu sawiin, "MZP in Inter High School Quiz hi 2010 atang khan kum tin kan lo buatsaih thin a, heta rawn tel ngam zirlai leh a thiam bikte phei chu Matric Exam result-ah pawh a titha ber berte an ni fo thin" a ti a. Mizo zirlaite Social Media khawvelah thudik lo post leh thehdarh kawngah fimkhur turin leh mahni zirlai dah hmasa turin a fuih bawk. 

MZP Inter High School Quiz hi MZP chuan kum 2010 atang khan kum tin a buatsaih thin a. MZP Inter High School Quiz 2022 hi Aizawl Smart City Ltd. ten an Sponsor a ni. Tun tum inelna ah hian sikul 15 an tel a, chuta a titha sikul pathum te chuan Zirtawp zan khan intihsiakna an nei leh a. Pakhatna hian lawmman Rs. 30,000/-,  Trophy, thuziak leh lehkhabu hrang hrang an dawng a ni.