Aizawl July 14, 2023 : MZP General Headquarters, Aizawl hruaitute chuan July Ni 12, 2023 khan tunlaia Manipur buaina avânga mipui venghimtute dinhmun hriatpui tur leh Zofaten harsatna an tawh te enfiahin an kal a, Mizoram mipuiten ṭanpuina pawisa an thawh leh mi ṭhahnemngai ten damdawi ṭhahnem tak an thawhte chu hlan. 

July Ni 12, 2023 zan khan Joint Student Body (JSB), Lamka buatsaihin, Manipur buaina avânga nunna chante hriatrengna hun 'Candle light vigil' hman a ni a. Hriatrengna hun hmannaah hian, MZP President Lalnunmawia Pautu chuan, "Tun hi ṭanrual hun a ni a, inlak hran hun a ni lo. Kan insuihkhawm a, kan inlungrual loh chuan kan chhehvela min do mektute hian min hneh theihna an nei a ni," a ti.

MZP president chuan, "Zofate hian chhan tur ram leh hnam kan la nei hi a lawmawm hle a ni," tiin, Mizoram mipui, NGO leh sawrkar chu Manipur Zofate lama an ṭan tlat thu sawiin, "Kei niin kan ei chhung chuan in nghei bik lovang," a ti bawk.

Manipura Zofate chuan buaina an tawh mekah, Mizoram sorkar, Kohhran, Political Party, NGO leh mipuiten an ngaihsaknaah an lawmzia an lo hrilh a ni.

MZP chuan Manipur tualchhung buaina avanga hnam tana beitute chu an duty na hmun hmun hrang hrang, Lamka leh a chhehvel (Frontline)-ah tlawhin an dinhmun te enfiah a ni a. Damdawi chi hrang hrang cheng 80,000 chuang man sem ral a ni a, pawisa pek a ni bawk.

Hmar Students Association General Headquarters pawh tlawh a ni a,  HSA hruaitute hian ṭha taka lo dawngsawngin, tunhnaia Meitei ten rawng taka an thah David Thiek ralna hun hman nghal a ni a, râlna hi HSA hruaitute hnenah hlan a ni.

Manipur buaina avânga mipui venghimtute tlawha an dinhmun hriatpui tur hian MZP President hovin Office Bearers, Adviser leh Extended OB ṭhenkhat an kal a ni.