Aizawl: National Institutional Ranking Framework (NIRF) ten kum tina an tih thin angin India rama university tha an tehna thar berah Mizoram University chuan 21-na a hauh pha. Zirna tluangtlam bik an thlurnaah hian university 36 thlan chhuah a ni a, Jawaharlal Nehru University (JNU), New Delhi chu 1-na a ni. MZU hi patent (nihna neitu) tur chhawp chhuah ngah zingah pathumna a ni bawk.

University tha tehnaah hian tehkhawng pasarih awmin, zirlai an lak dan leh an inrelbawl dan te, zirtir dan phung leh research lama hlawhtlinna te, University hmunhma leh ruhrel bakah khawsak dan phung te, Zirlai te sukthlek leh kaihhruai an nih dan te, Hmalam hun atana hlawhhtling tura inkaihhruai dan leh zirna zau zawk an neihpui dan te chu an tehna tlangpui a ni a, Objective score leh Perception score an dah sang hle.

Mizoram University-in zirlai an lak dan hi tha thawkhat niin endiktu tehna atang hian a hriat theih a, an zirtir dan phung leh research an neihpui dan erawh a tlanglawn ang velah a ngaih theih a, point 250 hmuh theihnaah 142.3 an hmu a, Hmunhma, hmanrua leh khawsak dan phung an tehnaah hian point 175 a hmuh theih laiin 112.4 an hmu pha.

Personality and leadership development lamah erawh duh thu a la sam lo hle thung a, point 150 hmuh theihnaah 63.7 chiah an hmu. Career progression and placement an tih huangah hian an hniam hle bawk a, an zirlai atanga hlawhtlinna an hmuh theihna tur leh zirna zau zawk an neih theihna atana hmalaknaah hian point 217 hmuh theih naah 89.8 chiah an hmu.

Career progression and placement chungchanga an hniam chhan ZALEN zawhna a chhan naah, MZU Registrar Prof. Lalnundanga chuan, “Ni e, professional course hovah hian industry te kan neih ve loh avang leh placement hmun dangte anga communication kan neih that loh avang hian kan sang mawh khawp mai,” tiin a chhang.

Infrastructure chungchangah Prof. Nundanga chuan, “Infrastructure-ah hian department tinte neih dan leh class room facilities, smart class room leh ICT enabled class room kan neih dan a ni ber a, tunah hian kan class room zawng zawng hi ICT enabled vek a nia, smart class room hi a department a zir a kan mamawh danin kan nei ve bawk,” tiin a sawi.

Mizoram University hi India ram university tha sawm zingah a tel thei ang em tih ZALEN zawhna chu, “India today ranking hi kan la hmel hriat lutuk lova, nirf erawh chu detail analysis kan nei. In vawrh theih dan chu a awm ang chu. Perception hi kan hniamna pakhat a ni,” tiin Prof. Nundanga chuan a chhang.

MZU-ah hian department 30 a awm a, heng department te hi hlawm lian deuh deuh pasarih a then an ni.