Aizawl July 7, 2022 : Mizoram University (MZU) chuan August, 2022 atang khian an zirlai te tana Bus service an neih thin chu an titawp tawh dawn a, zirlai tan kalna mahni inngaihtuah chawp a ngai tawh dawn a ni.

MZU Registrar Prof. Lalnudanga atanga ZALEN thudawn danin tuna Bus service an tih tawp chhan ber chu hemi atan hian pawisa sunction a awm tawh loh vang chu a bul ber a nih thu a sawi a, Central ministry atangin Bus hmanna tur pawisa hi an dawng tawh lo, a ti.

Registrar chuan 2017 atang khan Bus service chungchangah hian ministry lam hian titawp turin an rawn hrilh tawh tih a sawi a, chutih rualin khawpui atanga an hmunhma a hlat tham avangin kalpui zui a nih thu ZALEN a hrilh a, mahse, tuna chuan an pawisa hmuh dan te an rawn tihdanglam takah chuan service chhunzawm tir ngaihna a awm tawh lo, tih a sawi a, public transport service tir dan an ngaihtuah tih a sawi bawk.

Mizoram University chu India ram pum University zianga bus hire awmchhun an nih thu Prof. Lalnundanga chuan a sawi a, tunah chuan an tan service chhunzawm zel tir theih a nih loh thu pawh sawiin, staff te lam kual chungchang pawh la ngaihtuah that a tul dawn tih a sawi bawk. Bus paruk an neih te chu University campus chhungah erawh service tir an tum.

Zirlai naupang kal dan tur pawh nasa takin an ngaihtuah tih Registrar hian a sawi a, City Bus lam te pawh an lirthei service tir theih dan an sawipui tawh thu leh Tanhril Local Council ten an venga Line Bus lut tura sawrkar an dilna te pawh an ngaihchan thu ZALEN a hrilh bawk.