Aizawl February 18, 2024 : Naktuk atanga Mizoram Legislative Assembly budget session neih turah bill pali a lut tawh a, session hi March 13, 2024 thleng neih tura ruahman a niin ni 16 chhung neih a ni dawn a ni.

ZALEN thudawn danin tun session atan hian bill pali lut a awm tawh a, chungte chu Irrigation & Water Resources department atanga lut, ‘The Mizoram Water Resources (Management and Regulation) Bill, 2024, Vigilance department atanga lut 'The Mizoram Lokauykta (Amendment) Bill, 2024,’ Taxation department atanga lut, ‘The Mizoram Goods & Services Tax (Amendment) Bill, 2024’ leh Land Revenue & Settlement department atanga lut, ‘The Indian Stamp (Mizoram Amendment) Bill, 2024’ te an ni.

Assembly speaker hova Bussiness Advisory Committee thukhawmin ruahmanna an siam dan chuan naktuk session tan ni hian larsapin house-ah thu a sawi ang a, Feb.21 (Nilaini)-ah session kar laka member thite sunna hun leh larsap thusawia lawmthu sawina motion sawiho a ni ang.

Thudawn danin tun tum session-ah hian minister hlui, KL Lianchia bak sun tur an awm lo a ni.

February 27, 2024 (Thawhlehni)-ah chief minister, finance changtu ni bawk, Lalduhoma chuan kum 2024-2025 budget leh kum 2023-24 a sawrkar sum indaih loh dil belhna (supplementary demand) a pharh ang a. Budget hi Feb. 28 & 29-ah sawiho a ni ang a. March 5, 2024 (Thawhlehni) atangin minister hrang hrangte kumthar sum hman turte sawihova pass tum a ni ang.

Zirtawpni thleng khan Session neih tur atan hian zawhna House-a chhan chi (starred question) 417, ziaka chhan chi zawhna (unstarred question) 30, resolution 50 leh paper lay tur 5 a lut tawh a ni. Sawrkar atangin bill 1 'The Mizoram Water Resources (Management and Regulation) bill, 2024 a lut tawh bawk.