Aizawl: Aizawl Municipal Corporation chuan Aizawl khawpuia plastic hman khapna ‘plastic free city’ an kalpui mekah naktuk, Thawhtanni atang hian 50 microns chin plastic (polythene) te chu lakkhawm tan an tum.

AMC Mayor PC Lalhmingthanga chuan Zalen palai zawhna chhangin AMC thawktute chu bial insemin Thawhtanni atang hian an kal kual tan dawn tih a sawi. Plastic thlakna tur bag chu mipui daih a awm turah an ngai tih sawiin a tawih thei chi bag pawh siam an awm avangin plastic khap chuan mi tam tak tan eizawnna a siamsak dawn a ni, a ti. Mayor chuan Aizawl khawpui bawlhhlawh sawngbawlna hmun thar chu zawh la ni lo mah se tuna an paih mekna hmunah plastic chu paih hran a ni tih a sawi bawk.

AMC thawktute hnen atanga thudawn danin rua-hmanna hmasaa plastic zuar leh kawlte mansak zel an tum chu tidanglamin plastic kawlte chu an lakkhawmsak ang a, pawi-sa erawh an chawitir dawn hrih lo thung niin an sawi a. Naktuka AMC thawktu ten hma an lakna hmasa tur hi tihchian a la awm chiah lo nain Aizawl New Market leh hmun pawimawh dangte an tuam dawn nia thudawn a ni.

AMC thawktute chuan plastic khapna chu mipuiin an thlawp tha nia an hriat thu sawiin bazar leh dawr hrang hrangah pawh hmuh tur a vâng tawh tih an sawi a. Dawr thenkhat chuan an hnena thil leitute hnenah polythene an pek theih tawh loh thu leh mahni ina khaina/kenna tur intum a ngaih thu an sawi tawh tih an sawi a. Polythene var chi leh rambo polythene lo luhna ber, khawchhak lam atang pawhin lut a awm lo nia an hriat thu Zalen palai an hrilh bawk. Nimin zinga Zalen palaiin Aizawl hmun hrang hranga zing bazar a tlawh kualnaah pawh chawhmeh zuar tam takin polythene an hmang tawh lo tih a hmu a ni.

AMC hian August thla tir khan Aizawl kawtchhuah hmun 6 ah duty insiamin lirthei lut turte hnenah Aizawl khawpuiah plastic khap a nih thu hrilhin plastic keng lutte chu an thlaksak a. Duty hi kalpui ni tawh lo mah se heng kawtchhuahahte hian plastic khap a nih thu an tar bakah plastic leh thil dang paihna tur bawlh-hlawh bawm an chhawp a ni.

Lok Sabha Secretariat pawhin Thawhlehni kalta atang khan platic bottle leh plastic item chi reng reng Parliament complex chhunga hman an khap a, bag tawih thei (environment friendly) chauh hmang tawh turin an ti a ni.