Aizawl January 14, 2024 : Aizawl Municipal Corporation (AMC) hmalakna in, naktuk January ni 15, Thawhtanni atangin AMC huam chhung ah, mihring chenna in atanga feet 100 aia hnaiah Vawk vulh khap a ni dawn. Enfiahtu tur inspection team pawh din fel a ni tawh.

AMC hotute hnen atanga ZALEN thudawn danin, mihring chenna in atanga feet 100 aia hnai Vawk vulh khap hi khauh takin kalpui a ni dawn a, inkaihhruaina zawm lo te uluk takin vil an ni ang a, a hmun a enfiah zeltu tur inspection team pawh din fel a ni tawh a ni.

He thu ziahlai thleng hian Vawkvulh chungchanga harsatna bik nei, Local Council atanga recommendation la a AMC-a exemption dilna thlen mi pakhat (1) chauh a la awm.

June ni 28, 2023 a AMC Board of Councillors meeting in thutlukna a lo siam tawh angin, Aizawl khawpui chhung a lo thianghlim a, mipui an lo hrisel zawk nan leh leimin vanga chhiatna thleng a tlem zawk theih nan mihring chenna in atanga feet 100 aia hnaia Vawk vulh hi naktuk January ni 15, 2024 atangin khuahkhirh a ni dawn a ni.

Vawk vulh chungchang a inkaihhruaina thar hman tur hi AMC hotute chuan Aizawl City Local Council Association (ACLCA) hruaitute pawh an lo sawipui/hrilhfiah tawh a, Aizawl khawpui chhunga Vawk vulhtu zawng zawng te chu Vawkvulh kawnga inkaihruaina dan zawm theuh turin AMC leh ACLCA te chuan an ngen.