Union Home Minister Amit Shah chuan Assam leh Arunachal Pradesh ramri inkara buaina awm chu nakumah chin fel a ni dawn tih a sawi niin news agency PTI chuan a tar lang.

Shah hian Ramakrishna Mission Ashram, Narottam Nagar, Tirap district, Arunachal Pradesh a tlawh a. Union Law Minister Kiren Rijiju-a’n a tawiawm.

Shah hian hmarchhak chu hel pawl awm lohna hmun ni turin kawng dik a zawh mek thu a sawi a, Prime Minister Narendra Modi-a’n thuneihna a chan hnu, kum riat liam ta atang khan hel 9,000 zet an inpe tawh tih a sawi. 

Arunachal Pradesh leh Assam sorkar chuan ramri ching fel turin hma an la mek tih a sawi a. “Hmarchhaka thalaite hian silai leh petrol bomb an keng reng tawh dawn lo va, tunah chuan laptop kengin sumdawnna bul an tan tawh a. Hei hi sorkar laipuiin hmarchhak tihhmasawn a tumna rahbi chu a ni,” tiin a sawi tih PTI chuan a tar lang.

Ramria an buaina hi kum 1873-a British-ten Assam hmar lama inner-line regulation an siam atanga intan tawh kha a ni a. Heta tang state pawn mi Arunachal-a lut turte chu phalna neih a ngai.

Kum 1987-a Arunachal-in state nihna an neiha Assam chief minister hlui, Gopinath Bordoloi-a kaihhruai committee-in ramri a siamah a hmaa Arunachal UT ram chhung tam tak chu Assam-ah a dah lut a, hei hi tuna an buaina intanna tak a ni.