Aizawl January 11, 2024: Chief Minister Lalduhoma chuan vawiin khan Indian Weightlifting Federation - Youth, Junior leh Senior National Weightlifting Championships Itanagar, Arunachal Pradesh a, December 28, 2023 - 7 January, 2023 neih zawh taka a vawi hnih nana Senior National Weightlifting Championships, mipa huanga Best Lifter atana thlan Jeremy Lalrinnunga chu a Bungalow ah lawmpuina thingpui a inpui.

Chief Minister chuan, "Mizo thalai, la naupang tak infiamna lama khawvel hmelhriat kan nei hi lawmawm ka ti a. Mizoram leh India ti hming tha ni tura bei chhunzawm zel turin ka ngen che a ni," tiin lawmpuina leh duhsakna a hlan. Jeremy Lalrinnunga hian inelna lian tham lo awm tur atana inbuatsaihna a neih mek dan te leh hlawhtlinna a lo chan tawhte Chief Minister hi a hrilh a ni.

Best Lifter-ah hian Jeremy Lalrinnunga hi Senior National 2020 Kolkata, West Bengal ah khan thlan a lo ni tawh a, Senior National Weightlifting Championships ah Vawi thum Gold a lakna a ni. Youth Olympic Gold Medalist a lo ni tawh bawk.

Chief Minister hi Dr. Vanlalthlana, Minister, I&PR, etc., chuan a tawiawm a, Jeremy Lalrinnunga hi a pa Lalneihtluanga leh Mizoram Weightlifting Association hruaituten an tawiawm bawk a ni.