Commonwealth Youth Games-ah pawh India tana gold medal lo chawi chhuak tawh, Mizo tlangval, Lalruatfela chuan Youth National Weightlifting Championship neih mekah Mizoram tan kg 81 huangah silver medal a la leh ta.

India Weightlifting Federation (IWLF)-in Itanagar, Arunachal Pradesh-a December 28 atanga January 8 thleng awh tur National Senior, Junior leh Youth Weightlifting Championships a buatsaih mekah Bungzung tlangval hi youth championship-ah Mizoram inlanin Thawhlehni khan a pum puiah kg 280-a rit chawiin pahnihna a ni.

Ruatfela hian Snatch-ah kg 125 leh Clean & Jerk-ah kg 155 chawiin a vaiin kg 280 a chawi a. Maharashtra rit chawi chak, Sairaj Pradeshik (Snatch - kg 133 & Clean & Jerk - kg 161, total - kg 294) a tluk phak lo a ni.

Ruatfela hi India rit chawi chak zinga hmabak eng ber pawl niin July 12-16, 2023 chhunga Noida, Uttar Pradesh-a Commonwealth Youth Games neihah khan kg 81 huangah gold a la nghe nghe.

Noida-ah vek July 28-August 5, 2023 chhunga Asian Youth Weightlifting Championships-ah palina dinhmun a hauh tawh bawk.

Hemi hma, February thlaa 5th Khelo Youth Games 2023, Madhya Pradesh-ah khan 81 kg youth-ah silver medal a lo la tawh a. North East Games 2022-ah leh Sub Junior National 2023-ah gold medal a la tawh bawk.

Ruatfela hian kum 2019-ah Mizoram Weightlifting Academy zawmin nikum April thla khan National Centre of Excellence (NCOE), Patiala, Punjab-ah training turin an thlang a ni.

Tun tuma Arunachal Pradesh khawpuia India ram pum inelna buatsaih mekah hian Pathianni khan senior championship kg 61 huanga Jeremy Lalrinnunga’n Mizoram tan gold medal a lo chawi chhuak tawh a. Services tan he huangah tho hian Mizo tlangval, Lalhunthara’n bronze a awrh phak bawk.