Aizawl: Ministry of Health & Family Welfare, New Delhi leh Gujarat sorkar țangkawpin an buatsaih ‘14th Conference of Central Council of Health and Family Welfare (CCHFW),’ “Swasthya Chintan Shivir” ti a sawi bawk, Tent City, Kevadia, Gujarat-a neih mek chu nimin khan a hmawr bawk a ni a, Health Minister Dr R. Lalthangliana chuan thu sawina hun a hmang a, national level survey chuan Mizoram sawrkar hmalakna thatzia a tarlang tih a sawi.

Mizoram sawrkarin hriselna kawngah hma a lak dan chungchang sawiin Sub-Centre Health & Wellness Centre tha taka kalpui a nih thute, ASHA/Health Worker te hnathawh dan, damlote kalchilh a, nau chhar thlenga an thawh dante a sawi a, thingtlang kilkhawr ber ber thlenga an fan chhuah thin thu leh damdawi in awm lohna hmunah an tangkai zia a sawi a ni.

Dr Thangtea chuan sawrkar laipuiin tehfung hrang hrang hmanga a endikna (national level survey) hian Mizoram sawrkar hmalakna that zia a tarlang tih sawiin, "NITI Aayog in kum 2017 atanga endikna a kalpui khai-khawmna 'Healthy States, Progressive India' ah Mizoram chu State te ho (smaller states category) zingah pakhatna a ni. Infant Mortality Rate (naupiang 1000 zela thi zat) ah phei chuan kan chhuanawm hle a, kum 2009 a IMR 36 kha kum 10 hnu, 2019 ah chuan 3 ah a tla tawh a ni," a ti. 

Dr. Thangtea  chuan,"COVID-19 hripui leng avanga kan harsatna tawh atanga kan inzir a ngai. Mizoramin COVID-19 hripui dona kawngah kan ti that chhan chu mi zawng zawng kan tan rual vang a ni," a ti a. "Sawrkar department te bakah Tlawmngai pawlte, Sakhaw hrang hrangte leh private daktawr te leh damdawi in te nen kan tang tlang a, mipuiin min thlawp tlat avangin kan che tha a, hetiang hi hmun dangah a awm ve loh avangin sawrkar lian leh ram ropui tak takte pawhin an tawrh nasat phah a ni," a ti. 

Central Council of Health and Family Welfare (CCHFW) hi India Constitution Article 263 tlawhchhana din niin, India ram chhunga Hriselna (Health) kawnga sawrkar hmalakna chung-changa inrawn-khawmna sang ber a ni.

Inrawnkhawmna sang, Ministry of Health & Family Welfare a mi pawimawh te bakah state tina Health Minister te, Health Secretary te, leh Mission Director, National Health Mission te an tel a ni.

Mizoram ațangin Health Secretary R. Lalramnghaka leh Dr Eric Zomawia, Mission Director, National Health Mission te an tel bawk a ni.