Aizawl: Ni hnih awh Hotel Hyatt, Gachibowli, Hyderabad-a National Mines Ministers' Conference ah Commerce & Industries Minister Dr R. Lalthangliana chu telin nimin khan thu a sawi.        

Dr. R. Lalthangliana chuan Mizoramah Regional Coal Exploration nei tura hmalak mek a nih thu a sawi a. Coal India Ltd.  Ministry of Coal hnuaia Central Mine Planning & Design Institute Ltd (CMPDIL) leh Mizoram sawrkar hnuaia Directorate of Geology & Mining te chuan kum 2018 khan khan thawhhona thu thlungin an thawk dun tan tih sawiin lungalhthei hi hmun/ Block hnih a zawn tura ruahman a ni a ti a. Block khatna chu hinghlun/ Lushaicherra, Mamit District ah 33 sq. km a zauva zawn tur niin, a pahnihna chu West Rotlang, Lunglei District ah 48 sq.km a zauva zawn tur a nih tur thu a sawi a ni.

Thangtea chuan tun dinhmunah Directorate of Geology & Mining (DGM) hian Draft Tender Document siam tawhin CMPDIL-ah kumin May thla khan a thehlut tawh a. Hei hi annin lo endik tawhin vetted comment an lo pek angin siamrem ngaite siamrem a nih hnuah Notice Inviting Tender (NIT) tihchhuah a ni ang, a ti a. Lungalhthei zawn hi Company te tih tur niin a sum sen ngai tur zawng zawng 100% hi Central Government tum tur a ni tih a sawi.

Mizoram chhunga Oil & Gas zawn hna pawh ONGC, Oil India (OIL) leh Vedanta Ltd. ten a thawh mek thu leh hemi chungchanga chak zawka hna thawh a nih theih nan Commerce & Industries Department, GoM chuan June ni 22, 2022 khan Joint Meeting nei tawh tih Minister hian a sawi bawk.

He Conference in a tum ber chu Central Government leh State Government ten mineral zawnchhuah, hlawk leh him zawka laihchhuah kawnga thawh hona tha zawk neih leh kum 25 lo la awm turah Mineral Sector-a India hi Developed Nation a hlan kai a ni.

Minister hian Hyderabad-a meeting a zawh hnu hian karleh tir lamah Prime Minister hmalaknaa (initiative) meeting nei turin New Delhi a pan leh ang. New Delhi meeting hi High level meeting of Board of Trade niin Ministry of Commerce & Industry, Govt. of India huaihawt tur a ni thung ang.