July 26, 2023; Naupang huaisen Chhandama ti a Hindi ah leh Mizo subject kan zir thin kha kan la hre reng awm e. Keitum khua, Serchhip district ah cheng mekin, North-East State-a Jeevan Raksha Padak dawng hmasa ber a ni a, India ram pumah pawh pahnihna a ni pha.

ZALEN in a biakna ah Chhandama chuan, a thil lo tawn ve chu a huaisen bik em em vang a ni lo tih a sawi a, a hun leh a hmun a huaisenna chu Mizo zia a bet a nih thu leh thiante chhan ngai tlanchhiatsan an nih ngai loh thu a sawi.

Pu Aitluanga leh Pi Lallawmi te fapa Chhandama hi November ni 30, 1963-ah Chungtlang khua, Vaizakhama khua ni thin, Keitum bul lawkah a piang a. A pianna khua hi tunah chuan khawram a ni tawh.

Kum 11 a nih kum, 1974 June ni 15 a an ramkalna ah an thianpa Rinsiama (10) chu Saphai lian tak maiin a vial/zial bet a. Saphai chu a len em avangin hriamhrei tel lo phei chuan tumahin an chhan mai ngam lo va. Kum 11 mi Chhandama chuan hriamhrei engmah keng loin, a thianpa delh bettu Saphai lian tak chu a hnek ta vak va a, Saphai chu a tawlhsawn ta a ni.

He a thil tih huaisen thlak tak vang hian, Chhandama hi North-East State-a Jeevan Raksha Padak dawng hmasa ber niin, India ram pumah pawh pahnihna a ni pha hial a. Kum 1976, August ni 15 khan India president aiawhin Mizoram chief minister Pu Ch.Chhungan Lammualah a hlan a ni.

Lawmman hian tangkafai Rs. 500 leh medal a keng tel.

Huaisen Nopui lo dawng tawh Chhandama hi a nupui fanaute nen Keitum khua ah an khawsa mek a, he a thil tih huaisen thlak tak hi tun thlengin hriat sak a la ni a, chawimawina hrang hrang pawh pek a la ni fo thin.