July 7, 2022; BJP kaihhruai National Democratic Alliance (NDA) presidential candidate, Droupadi Murmu-i chuan vawiin hian lehlangin Mizoram a rawn tlawh a, a pual a Aijal club a hun hmanna-ah opposition leader, ZPM MLA Lalduhoma chu thusawi turin programme duanna hmasa ah telh ni mah se, a tel theih loh tur thu programme siamtute a hriattir hnu-ah programme atangin paih leh a ni.

Hemi chungchangah hian ZALEN zawhna chhangin ZPM leader ni bawk, Lalduhoma chuan, NDA presidential candidate in Mizoram a rawn tlawh turah, khulam a an hotuten opposition leader lo sawm tel ve rawh u, anti niawm a a hriat thu sawiin, programme a thusawi tur zingah a hriat miah lohin an lo telh tih a sawi a, state BJP vice president in programme a a tel thu message a a hriattir thu te, programme pawh message vek a a dawn thu te a sawi.

ZPM leader chuan state BJP vice president hnenah programme atanga a hming paih tura a hrilh thu leh, an tel ve na chi a nih loh thu te a hrilh tih sawi bawkin, a ngenna angin programme siamthain, a hming pawh an paih thute, an siamthatna pawh message a an thawn leh thu te sawiin, programme siamthat hma, thusawi tura a hming an lo tarlanna zawk erawh a darh ta tho niin a sawi. 

ZALEN zawhna chhangin ZPM leader chuan president thlanna neih turah vote tur an tih chian tawh thu a sawi bawk.

Hemi chungchangah hian ZPM legislature party pawhin sawifiahna siamin, programme siam chhinnaah Minister of State, BJP State unit aiawh leh sorkar lam atanga protocol buaipuitu mi tlemte chauh an tel thu tarlangin, hetianga midang tihhmelhem tumna nei ran a, programme siam chhin, hman leh loh tur tihdarh a ni chu pawi an tih thu an tarlang.

Draupadi Murmu hi vawiin chawhma lam khan Lengpui Airpot ah Special Flight in a rawn tum a, Chief minister, Information minister leh Law minister ten anlo hmuak a, hemi hnu hian Aijal club ah hun hman chhunzawm a ni.

Election Commission of India (ECI) chuan July ni 18, 2022 ah India President thar tur thlan a nih dawn thu leh, July ni 21 ah vote chhiar a nih dawn thu a lo puang tawh a, president tanglai, Ramnath Kovind term chu July ni 25 ah a tawp dawn a ni.

BJP kaihhruai NDA candidate Droupadi Murmu-i leh eptu pawlte joint candidate Yashwant Sinha-te pawhin nomination paper an thehlut ve ve tawh.