Aizawl June 3, 2024 : Aizawl District Court building-a awm ND&PS Court chu rawk a ni a, he thu ziah lai hian a rawk hun hi hriat a ni mai lo a. Nuai 25 vel rukchhuah a nia thudawn niin Zirtawpni leh Pathianni inkara rawk nia ngaih a ni hrih a, chhuizui mek a ni.

Aizawl Police Station atanga thudawn danin rukru te hian ND&PS Court pawisa dahna 'safe' hi an tum ber niin an ngai a,'safe' chhungah hian Cheng Nuai 55 vel awm nia ngaih niin rukru te hian Cheng Nuai 25 vel an lachhuak niin an hria a, office bungrua engmah dang an khawih lo nia ngaih a ni.

Aizawl PS atanga thudawn danin Zirtawpni bak kha ND&PS Court hi an kal tawh lo a, tukina office an hmuh chuan hetianga inrawkna hnuhma hi an hmu ta a ni.

Aizawl District Court Building-ah hian a luhna Gate-ah chuan duty an awm a, mahse, he court huamchhung hi a hranpaa hung a ni loh avangin a hnuailam atangin a luh chhoh theih a, basement atanga 'lift-a' chhohna hi security duty-na atang hian a hmuh phak lo tih Aizawl Police Station OC chuan ZALEN a hrilh.

Court building chhungah hian CCTV installation tih a ni lo hrim hrim tih Aizawl PS OC chuan a sawi a, hei hian hnu chhui pawh a tih harsat a rin thu a sawi bawk.