Aizawl:Health Minister Dr. R.Lalthangliana chuan nimin khan Shillong Mizoram House ah North Eastern Council (NEC) hotute meeting neihpuiin Mizoram hmasawnna tur hrang hrang a sawipui.
Minister-in health sector-a Mizoram mamawh a thlen zingah Lunglei District Hospital Staff Quarter sakna tur te, Kolasib District Hospital Complex-a CMO Office sakna tur leh Central Vaccine Depo chungchang te a tel a. Mizoram sorkar enkawl hospital-ah MRI a awm loh thu sawiin hmalaksak turin a ngen a. Hei bakah hian Comprehensive Spastic Children Care Centre, Bawngkawna sak mek chu 3rd installment sum release fel thuai turin a ngen bawk. NEC Planning Adviser chuan health sector-a Mizorama hmalakna kal mekte sawiin Minister thu thlen chu bawhzui a nih tur thu a sawi bawk.
Hei bakah hian Pachhunga University College Cluster Academic Block, DM & R-in lirnging laka him lo nia an sawi avanga a thar sakna tur te, Aizawla Women Hostel sakna tur te, Pukpui-a Mizoram Engineering College-ah Administrative Building leh Classroom chauh a awm thu te, khawpui atanga a awmna a hlat avangin staff quarter neih ngei a tul thu a sawi bawk. NEC Planning Adviser hian hma a lo lak tur thu te, Women Hostel leh Engineering College-a an harsatna te chu an hnena DPR thehlut tur leh HRD lama an recommend tur thuin a chhang.
Minister hian tun hma atanga Mizoram kut hnathawktu ten sawhthing chungchanga harsatna an tawh thu te, sawhthing market mumal loh dan leh Silchar leh Bagha sumdawngtea a innghah thu a sawi a, Mizoram hmun hrang hranga sawhthing sawngbawlna (ginger processing centre) din a nih theih nana hma lakpui turin a ngen a. Hnahthial-a Multipurpose Centre sakna tur te, NEIGRIHMS bula Mizoram sorkarin ram acre 2 a neih hmang tangkaia Multipurpose Convention sakna tur te a sawipui a, NEC Planning Adviser hian a lo bawhzui tur thuin Minister hi a chhang a ni.
Dr. Thangtea hi C.Ramhluna, Chairman, Industrial Development Committee, Pu J. Hmingthanmawia, Director, Commerce & Industries ten an tawiawm a. NEC atangin Planning Adviser C.H. Kharsing; HK Das, HRD Sector leh R.Lalrodingi Adviser te an tel a ni.