ZALEN January 8, 2024: Food, Civil Supplies & Consumer Affairs Department-in mipuite hnena ngenna siam a, ration buhfai lakna tur ni lo document pawimawh atana hmang duh tan Not Entitled for Ration (NER) Card siam tura mipui a ngenna ngai pawimawhin mi parukiin an ration card chu NER-a siam turin department ah an thehlut tawh.

FCS&CA department chuan thuchhuah siamin ration buhfai hi mi harsa zualte ei leh bara chhawmdawlna tur a ni a. State thenawn - Tripura, Arunachal Pradesh, Assam leh hmun dangah chuan central sawrkar atanga a thlawna buhfai state-ten an dawn bak an sem meuh lo a. Mizoramah chuan mipui harsatna hrethiamin sawrkarin ama sensovin ration card vär hmangin mipui nawlpui hnenah retailer kaltlangin buhfai man tlawm zawka leina remchang a siam thin tih an tar lang.

Hun lo inher zelah ration card var hmang chhungkaw tam takin ration buhfai an la lo chungin ration card neih an duh a. Chu chu sawrkarin lo ngai pawimawhin leh mi tam takin an ration card neih mek chu sawrkara surrender an duh tih hriain ration buhfai lakna tur ni lo, chhungkaw member tihchianna atana document pawimawh tak ni si, NER card chu kum 2019 atang khan sawrkarin a siam chhuak ta niin an sawi.

Ration card hi thil pawimawh hrang hrang tih nana document pawimawh a nih avangin hman tulna a awm thin a. Hetiang mite tan liau liau hian sawrkarin a kalpui mêk niin FCS&CA chuan an sawi bawk.